Bi sedan welatiyên Hesekê li pêşiya Navenda Meclîsa Malbatên Şehîdan a bajarê Hesekê li hev civiyan û cenazayê şervanê YPG’ê Sîpan Ehmed (Nûman) wergirtin û bi karwanekî wesayîtan ber bi Goristana Şehîd Dijwar a li gundê Dawûdiyê ve ketin rê.

Li goristanê ji bo bîranîna şehîdên azadiyê deqîqeyek rêz hate girtin û ji aliyê şervanên YPG/YPJ’ê ve merasîmeke leşkerî hate lidarxistin. Piştre Endama Meclîsa Malbatên Şehîdan Ezîze Ehmed, Endamê Fermandariya YPG’ê Diyab Hesekê, Serokê Meclîsa Rêveber a Rêveeriya Xweseriya Demokratî ya herêma Cizîrê Ebdilkerîm Sarûxan axivîn.

Axaftvanan sersaxî ji malbatan şehîd re xwestin û wiha gotin; “Bi saya fedekariya şehîdan yekîtiya pêkhateyên herêmê hatiye avakirin û bi saya xwîna şehîdên weke Nûman, Avesta Xabûr û hemû şehîdên rêya azadiyê wê serkeftin ya gelê Bakurê Sûriyeyê be.”

Di dawiya merasîmê de belgeya şehadeta şehîd Nûman hate xwendin û radestî malbata wî hate kirin. Girseya gel cenazeyê şehîd li ser milên xwe kirin, bi dirûşmeyên ‘Şehîd Namirin’ û tilîliyên dayikan spartin axê.