Bi sedan kes ji bo tevlî merasîma cenazeyê şehîdê YPG'ê Casim Tah El Salih (Mûrad Til Temir) bibin, li ber Meclîsa Malbatên Şehîdan a Til Temirê li hev civiyan.

Ji fermandarên YPG'ê Ziyad Kurdî piştî deqeyeke rêzgirtinê axivî, sersaxî ji malbatên şehîdan re xwest û got, herêm bi saya têkoşîna şehîdan azad bûye.

Kurdî diyar kir, şehîd Mûrad ji bo azadiya gelê xwe canê xwe feda kiriye û destnîşan kir, ku ew ê li ser şopa şehîd Mûrad û hemû şehîdên azadiyê bin.

Li ser navê Meclîsa Malbatên Şehîdan Mihemed Baqî Kûtê jî hemû şehîdên azadiyê bibîr anî û anî ziman, ku biratî û hevgirtina gelê herêmê pêşî li hemû planên dijminane girtiye. Kûtê berxwedana YPG, YPJ û QSD'ê silav kir û got, ti hêz nikare vîna gelê Bakurê Sûriyeyê bişikîne.

Di dawiya merasîmê de belgeya şehadetê ya Mûrad Til Temir hate xwendin û radestî malbatê hate kirin. Cenazeyê Şehîd Mûrad ji bo were veşartin ber bi gundê Hûmir ê lê ji dayik bûye hate şandin û li wir hate veşartin.