Cenazeyê şervanê YPG’ê Hemdo spartin axê

Bi tevlîbûna sedan welatiyên Kantona Kobanê cenazeyê şervanê YPG’ê Ebdullah Hemdo (Rojhat Kobanê) bi merasîmekê li Goristana Şehîd Dicle spartin axê.

Girseyê cenazeyê şervanê YPG’ê Rojhat Kobanê ji nexweşxaneyê girtin û ber bi goristanê ve ketin rê. Di merasîmê de li gel endamên rêveberiya xweser, saziyên civaka sivlî, şervanên YPG/YPJ’ê û hêzên asayîşê amade bûn.

Li goristanê merasîm bi deqeyek rêzgirtina leşkerî ve destpê kir. Piştre Fermandarê YPG′ê Zerdeşt Kobanê axivî, şehîdên meha Gulanê û hemû şehîdên azadiyê bibîr anîn. Zerdeşt soza domandina berxwedanê, şopandina rêya şehîdan û parastina destkeftiyên wan da.

Hevseroka Meclîsa TEV-DEM′ê Eyşe Efendî jî soza domandina têkoşînê heta pêkanîna armancên şehîdan dubare kir û got: ″Wek dayikên şehîdan, me biryara azadiyê da û di vê oxirê de bedelên giran da.″

Piştre nasnameya şehîd hate xwendin, radestî malbata wî hat kirin.

Di dawiya merasîmê de darbesta şehîd bi dirûşmên ‘Şehîd Namirin’ spartin axê.