Bi sedan şêniyên bajarê Hesekê û navçeya Til Temirê beşdarî merasîma veşartina cenazeyê şehîd Newres El-Kenas (Şahîn) li Goristana Şehîd Dijwar a li gundê Dawûdiyê bûn.

Şêniyan cenazeyê şehîd Newres El-Kenas ku di 22’yê Kanûnê de li Til Temirê şehîd bûbû, wergirtin.

Li goristana şehîdan, Hêzên Sûriyeya Demokratîk (QSD) û Yekîneyên Parastina Gel (YPG) û Yekîneyên Parastina Jin (YPJ) merasîmeke leşkerî li dar xist. Piştre li ser navê hêzên leşkerî Sebrî Şedadê axivî û got: "Şehîd sembola me ne û em bi wan serbilind in. Heta gihaştina civakeke demokratîk û azad em ê li ser şopa şehîdan bin.”

Her wiha li ser navê Meclisa Malbatên Şehîdan Mihemed El-Zahir sersaxî ji malbata şehîd Newres re xwest.

Di dawiya merasîmê de endama Meclisa Malbatên Şehîdan Hedle Ehmed wesîqeya şehîd xwend û radestî malbata şehîd kir.