Bi sedan welatiyên Til Hemîsê cenazeyê şervanê QSD’ê Macîd Îbrahîm (Ocalan Qamişlo) ku 31’ê Çileyê di ‘Pêngava Bagera Cizîrê’ de şehîd bûbû, ji Meclîsa Malbatên Şehîdan a Qamişlo wergirtin û bi karwanekî wesayîtan ber bi goristana şehîdan a Til Hemîsê ve ketin rê.

Li goristanê ji bo bîranîna şehîdên têkoşîna azadiyê deqîqeyek rêz hate girtin û ji aliyê şervanên QSD’ê ve merasîmeke leşkerî hate lidarxistin.

Piştre endamê Meclisa Malbatên Şehîdan Mihemed Xilêwî axivî, sersaxî ji malbata şehîd re xwest û wiha got: "Me bi saya têkoşîna şehîdan azadiya xwe bi dest xist. Berxwedana şervanan bi ser dikeve û demeke kurt maye ku di aliyê leşkerî de çeteyên DAÎŞ`ê li Bakur û Rojhilatê Sûriyê ber bi tunekirinê ve diçin.”

Piştre nasnameya şehadetê ya şervanê QSD’ê hate xwendin û radestî malbata wî hate kirin. Girseya gel bi dirûşme û tilîliyên dayikân cenazeyê şehîd li goristanê veşartin.