DEM Partî danezana civîna xwe ya ku di 22’ê Gulanê de ji bo nirxandina pêvajoya “Aştî û Civaka Demokratîk” li dar xist, eşkere kir. Di danezanê de wiha hate gotin, “Serketina pêvajoyê, bi têkoşîna çalak û rêxistinkirî ya ku gel tê de ne pêkan e.”
Meclisa Partiyê (PM) a Partiya Wekhevî û Demokrasiyê ya Gelan (DEM Partî) duh civiya. Di encamnameya civînê de wiha hate gotin: “Dinya, Rojhilata Navîn û Tirkiye di serdemeke krîzên piralî ya ku modernîteya kapîtalîst rê li ber vekirî re derbas dibin. Di vê serdema ku Rojhilata Navîn jinûve tê dîzaynkirin de, şer û pevçûnên herêmê zêde dibin, gelên me di dorpêça şer, tundî û kedxwariyê de tên hiştin. Bi şerê li Ûkrayna-Rûsyayê dest pê kir û bi 7’ê Cotmehê re li Xeze û Lubnan û Sûriyeyê belav bû re hemû welatên herêmê tifaqên şerê nû û polîtîkayên dagirkeriyê yên nû ava dikin.”
Di encamnameyê de wiha hate gotin: “Ev pêvajoya ku gelan di dorpêça şer, tundî û mêtingeriyê de digire, di heman demê de bi rêya berxwedana gelan re derfetên avakirina pergala demokratîk, civakîparêz, sosyalîst û azadîxwaziya jinê jî pêşkeş dike. Di vê çarçoveyê de; ‘Banga Aştî û Civaka Demokratîk’ a birêz Abdullah Ocalan a di 27’ê Sibatê de deriyê serdemeke nû vekiriye û bi biryara bidawîkirina xebatan a ku PKK’ê di 12’emîn Kongreya xwe de girtî re jî ev pêvajo derbasî qonaxeke nû bû.
AVAKIRINA CIVAKA DEMOKRATÎK
Pêvajoya diyalogê ya di navbera dewletê, birêz Ocalan û Tevgera Kurd de didome ne tenê ji bo çareseriya pirsgirêka Kurd, di heman demê de ji bo avakirina civaka demokratîk a Tirkiyeyê jî derfetan diafirîne. Partiya me, bi înîsiyatîfa Şandeya Îmraliyê ya partiya me re û bi tevahiya avadaniya xwe, ji bo civakîbûn û mayindebûna aştiyê berpirsyartiyê li xwe digire. Pêvajoyên aştî û çareseriya demokratîk, bi qasî derfetên dîrokî, di heman demê de bi xwe re rîskên cidî jî tînin. Lewma, partiya me ji bo ev pêvajo ji bo gelên Tirkiyeyê baştir bibe û li gorî daxwaza wan biencam bibe, bibiryar e ku têkoşîna xwe mezin bike.
Di civîna me ya Meclîsa Partiyê de bal hate kişandin ku divê xeta îdeolojîk-polîtîk û rêxistinî-pratîk a DEM Partiyê were bilindkirin û hevgirtineke têkoşînê ya ku bi giyanê serdemê û guherînê re têkildar e; bal hat kişandin ku derfeta me ya teşekirina pêvajoyê di rêveçûna tê xwestin de û derketina ji vê pêvajoyê bi destketiyên girîng ên ji bo gelên me re, ji her demê mezintir e.
PÊKHATEYÊN HERÎ DÎNAMÎK ÊN VÊ PÊVAJOYÊ CIWAN, JIN Û KEDKAR IN
Partiya me berpirsyariya mijara damezrîner a demokratîkbûyîna Tirkiyeyê, li gel têkoşîna azadî û wekheviyê hildigire ser milê xwe. Veguherîna pêvajoya bidawîbûna pevçûn û şîdetê bi aştiyeke mayînde, ancax bi çareseriya demokratîk a pirsgirêka Kurd a li ser bingeha mafên wekhev pêkan e. Di çareseriya pirsgirêka Kurd de, partiya me ku di veguherîna demokratîk a avadaniya civakparêz û dewletê de hêzeke tolhildêr e, firsendên derketine holê yên alîgirê gelan û bindestan weke wezîfeyeke bingehîn e. Pêkhateyên herî dînamîk ên vê pêvajoyê ciwan, jin û kedkar in.
HER KES BERPIRSYAR E
Polîtîkayên şer ên bi dehan salan, gelên di nava bêhêvîtî û xizaniyê de asê mane, hiştine. Ev banga Birêz Ocalan kiriye ku ji bo aştî û çareseriyên demokratîk zemîneke nû ya diyalogê bê avakirin. Vê pêvajoyê derfetên têkoşîna demokratîk jî berfireh kir. Di vê qonaxa dîrokî de ku çareseriya demokratîk a pirsgirêka Kurd, civakîbûna daxwaza aştiyê û derfetên avakirina civaka demokratîk derketine holê, bi taybetî di têkoşînên siyasî û civakî de aşkera ye ku berpirsyariyên cidî dikevin ser milê tevahiya civakê.
FIRSENDÊN GIRÎNG Û RÎSKÊN CIDÎ
Pêvajoya aştiyê hem firsendên girîng di nav xwe de dihewîne û hem jî rîskên cidî jî di nav xwe de vedihewîne. Pêvajo wê bi têkoşîn û muzakereyan bi teşe bibe. Ji ber vê yekê, mezinkirina têkoşîna îdeolojîk û rêxistinî û ji bo pêvajo veguhere destketiyeke ji bo gelên Tirkiyeyê, wezîfeya bingehîn a partiya me ye. Veguherîna demokratîk tenê di çarçoveyeke ku pêşî li berjewendiya her 85 milyon mirovî vedike û bi vîzyoneke hevpar a siberojê ku her kes dikare xwe tê de bibîne dikare pêk were. Di vê rêyê de ked, dilsozî û têkoşînek mezin pêwîst e. Qebûlkirina ku em di serdemeke wiha dijwar re derbas dibin, li ser rêgezeke veguherîner û rizgarker hûr dibin, divê berpirsyariya sereke ya hemû hêzên ked û demokrasiyê be, bi taybetî jî partiya me.
PÊWÎSTÎ BI LIHEVKIRINEKE CIVAKÎ HEYE
Serketina pêvajoyê bi têkoşîna aktîf û rêxistinbûyî ya gelên tevlî bûne, pêkan e. Di pêvajoya diyalogê de divê gelên me hem bibin kirde, hem jî bibin garantiya destketiyan. Di civakîbûna daxwaza aştiyê û avakirina civaka demokratîk de berpirsyariya hêzên sosyalîst ên şoreşger girîng e. Di vê pêvajoyê de xurtkirina têkoşîna hevpar a eniya demokrasiyê jiyanî ye.
