Hevserokê Giştî yê Partiya Wekhevî û Demokrasiyê ya Gelan (DEM Partî) Tuncer Bakirhan, bi Serokê Giştî yê Partiya Gelecekê Ahmet Davutoglû re civiya. 

Serokwekîlên Koma DEM Partiyê Gulistan Kiliç Koçyîgît û Sezaî Temellî jî di şandeyê de cih girtin. Şande, li Navenda Giştî ya Partiya Gelecekê ji hêla Davutoglû, Serokwekîlê Giştî Ayhan Sefer Ustun û wekîl Kanî Torun û Mûstafa Bîlîcî ve hate pêşwazîkirin. 

Di civîna ku ji çapemeniyê re girtî hat lidarxistin de li ser rojevên herêmî û Tirkiyeyê danûstandin hatin kirin. Di serdanê de pêvajoya demokratîkbûna Tirkiyeyê, hevdîtina dawî ya Şanda Îmraliyê ya DEM Partiyê bi Rêber Apo re û biryarên kongreya PKK’ê yên di 12’ê Gulanê de hatibûn ragihandin, hatin nîqaşkirin.

Di civînê de kûrkirina diyaloga di navbera aliyan de û gavên ji bo aştî û çareseriyê yên li Meclisê werin avêtin hatin nirxandin. Hat diyarkirin ku avakirina komîsyonek bi rayeya tam a Meclisê û bi rêbazek ku hemû partiyên siyasî di vê pêvajoyê cih bigirin, gelekî girîng e.

DEM Partî wê hefteya bê bi pêkhateyên partî û hêzên tifaqê re û her wiha bi AK Partî û MHP’ê re jî hevdîtinan bike.