Bi sedan welatiyên Minbicê cenazeyê şervanê Meclîsa Leşkerî ya Minbicê Ebdulhemîd El-Letfo (Mûrad Zaza) ku 24’ê Mijdarê di teqîna li Minbicê de şehîd bûbû, ji Nexweşxaneya Firatê wergirtin û bi karwanekî wesayîtan ber bi Goristana Şehîdan a bajêr ve ketin rê.

Li goristanê ji bo bîranîna şehîdên têkoşîna azadiyê deqîqeyek rêz hate girtin û şervanê Hêzên Erka Xweparastinê merasîmek leşkerî lidarxistin. Piştre Rêveberê Saziya Malbatên Şehîdan Mehmûd El-Îdo, ji fermandarên Meclîsa Leşkerî ya Minbicê Îbrahîm El-Benawî, Fermandarê Foca Şehîd Mihemed Zaza û Hevserokê Meclîsa Rêveber ya Rêveberiya Sivîl a Demokratîk a Minbic û Gundewarên wê Mihemed Şêxo axivîn.

Qisekeran sersaxî ji malbata şehîd re xwestin û wiha gotin; “Xwîna şehîdan a zelal nexşeya jiyana azad û demokratîk xêz dike, em bi şehîdên xwe serbilind in ji ber ku xak û rûmeta me parastin, ew in parêzvanên rasteqîn ên vî welatî ne.Teror ne ol û ne jî mezhebê jê re heye, ne sivîl û ne jî leşker nas dike, me îro şehîdek da û em ê bidin heya bighêjin azadî û edaletê."

Piştre nasnameya şehadetê ya şehîd hate xwendin û radestî malbata şehîd hate kirin. Girseya gel cenazeyê şervanê Meclîsa Leşkerî ya Minbicê Ebdulhemîd El-Letfo (Mûrad Zaza) bi dirûşme û tilîliyan li goristanê veşartin.