Di merasîma veşartina cenaze de endamên Rêveberiya Sivîl a Demokratîk û saziyên girêdayî wê, nûnerên ji partiyên siyasî, Meclîsa Leşkerî ya Minbic û saziyên taybet bi jinan amade bûn.

Karwana şehîd ji Nexweşxaneya Firatê ber bi goristana şehîdan a li aliyê rojavayê bajêr ve dest pê kir.

Li goristanê, endamê Hêzên Meclîsa Leşkerî ya Minbicê Bozan Kobanê axivî û wiha got: "Di dema dawî de dewletên dijber, di serî de dewleta Tirk tevahî rêbaz û zext li dijî gelên herêmê pêk anîn. Lê di şkandina vîna gelan de bi bin ketin. Gelê me bi saya şehîdan ji berê bi hêztir e û em ji çi rewşeke awarte re amade ne."

Piştre endama Meclîsa Malbatên Şehîdan Fatme Ezo wiha got: "Em hemû şehîdên di oxira axa welat de canê xwe dane silav dikin. Rojane em di oxira welatê me bi ewle û îstîqrar be de, şehîdan didin."

Fatme soz da şehîdan ku ew ê mîrateya wan biparêzin û li ser şopa wan bin.

Endamê rêveber ê HPC′ê Elî El Cimêlî li ser navê Rêveberiya Sivîl a Demokratîk a Minbicê axivî û wiha got: "Ji mafê me ye ku em serê xwe bi şehîdên xwe bilind bikin, ji ber di oxira em bi aştî û ewle bijîn de canê xwe dane.”

Di dawiyê de endamê Meclîsa Malbatên Şehîdan Mehmûd Ebû Îdo nasnameya şehîd xwend û radestî malbatê kir.