Bi sedan welatiyên navçeya Dirbêsiyê ya Hesekê cenazeyên şervanên Hêzên Sûriya Demokratîk (QSD) Qeyis Kîşa (Dewran Dirbêsiyê) û şervanê YPG`ê Hisên Mehmûd (Hogir Dirbêsiyê) ku li Dêra Zorê şehîd bûbûn bi merasîmekê li Goristana Şehîd Rustem Cûdî ya gundê Berkevirê veşartin.

Girseya gel cenazeyê herdu şehîdan ji Meclîsa Malbatên Şehîdan a navçeyê wergirtin û bi karwanekî wesayîtan ber bi Goristana Şehîd Rustem Cûdî ve ketin rê. Li goristanê ji bo bîranîna şehîdên têkoşîna azadiyê deqîqeyek rêz hate girtin û ji aliyê şervanên YPG/YPJ’ê ve merasîmeke leşkerî hate lidarxistin.

Piştre li ser navê Meclîsa Malbatên Şehîdan Hisen Ibêd axivî û got; "Em soz dikin ku em ê rêya şehîdan bişopînin û armancên wan pêk bînin. Şehîd ji bo jiyana azad a gelan canê xwe feda kirin.”

Ji fermandarên YPG`ê Agirî Jînda axivî û wiha got; “Em ji şehîdan hêzê digrin û bi her şehadetekê re em soza xwe dubare dikin. Di demeke nêz de em ê herêmên Dêra Zorê mîna herêmên din ku me rizgar kirine, ji destê terorê rizgar bikin.”

Piştre li ser navê malbata şehîd Dewran birayê wî ku şervanê YPG`ê ye Îmar Kîşa û bi navê malbata şehîd Hogir Ferhan Mehmûd axivîn û soza şopandina rêya şehîdan nû kirin.

Dawiya merasîmê de nasnameyên şehadetê yên şehîdan hatin xwendin û radestî malbatên şehîdan hatin kirin. Girseya gel cenazeyê herdu şehîdan bi dirûşme û tilîliyan li goristanê veşartin.