Bi hezaran şêniyên navçe û bajarokên kantona Qamişloyê li bajarê Qamişlo û Dêrikê ji bo şermezarkirina Komploya Navneteweyî û êrîşên dewleta Tirk a dagirker bi dirûşma “Bi yekitiya gelan em ê êrişên dewleta Tirk a faşîst têk bibin û Rêber Apo azad bikin” daketin qadan.

Li Qamişloyê bi hezaran şêniyên bajêr û navçeyên Til Hemîs, Amûde, Tirbespyê ji Çerxerêya Felahîn (Cotkaran) heta rêya ber bi balafirgeha Qamişloyê ve meşiyan. Xwendekarên dibistanan, rûspiyên Ereb û Kurd, endamên saziyan û ciwan tev li xwepêşandanê bûn.

Li ber têketina balafirgeha Qamişloyê meş rawestiya û veguherî mîtîngê. Di mîtîngê de endama Însiytîfa Gel a Herêma Cizîrê Nisrîn Doko axivî û berxwedana gelan a li hember Komploya Navneteweyî ya li dijî Rêberê Gelê Kurd Abdullah Ocalan silav kir.

Nisrîn wiha axivî: “Gelê me yê berxwedêr ku dijmin jê ditirse, li ser rêya Rêber Abdullah Ocalan e ku beriya 25 salan di encama Komploya Navneteweyî de ji Sûriyeyê derket.”

Di dawiyê de Nisrîn got: “Dewleta Tirk bi armanca şikandina vîna gel êriş dike. Lê belê gelê me dev ji rêgeza têkoşînê bernade. Hebûna Kurdan rastiyek e û tu hêz nikare wan tune bike. Gelê me tu carî gav paşde naavêje û wê li qadan be.”

‘HER HÊZEKE BÊDENG DIMÎNE ŞIRÎKÊ KOMKUJIYAN E’

Endamê Însiyatîfa Gel a Herêma Cizîrê Ebdulkerîm Saroxan Komploya Navneteweyî şermezar kir û got: “Hemwextî salvegera komployê, dewleta Tirk bi awayekî hovane êriş dike. Sivîlan û saziyên xizmetguzariyê; kehrebe, av, sotemenî û enerjiyê dike hedef. Ev ne êrişeke ketober e.”

Saroxan destnîşan kir ku li Îmraliyê Rêber Abdullah Ocalan rûbirûyî êşkenceyeke herî hovane ye û ji 3 salan ve agahî jê nayê wergirtin, tevî wê jî Rêberê Gelê Kurd Abdullah Ocalan berxwedaneke bêhempa didomîne.

Saroxan got ji ber ku komplo negihaşt serî, dewleta Tirk êriş kir û wiha pê de çû: “Her hêzek li hember van êrişan bêdeng dimîne, şirîkê komkujiyan e.”

Şandeyeke Însiyatîfa Azadiya Rêberê Gelê Kurd Abdullah Ocalan a Sûriyeyê, Însiyatîfa Parêzeran a ji bo Parastina Rêber Abdullah Ocalan û Meclisa Malbatên Şehîdan a Herêma Cizîrê, nameyeke têkildarî sûcên li dijî Rêberê Gelê Kurd Abdullah Ocalan û êrişên dewleta Tirk a dagirker ên li dijî herêmê, radestî navenda têkiliyan a Rûsyayê ku li balafirgeha Qamişloyê ye, kir. Lê navendê, name wernegirt.

Têkildarî vê mijarê, endamê Însiyatîfa Azadiya Rêber Abdullah Ocalan a Sûriyeyê Silêman Ehmed helwesta Rûsyayê ya li hember Komploya Navneteweyî û êrişên dewleta Tirk a dagirker şermezar kir û destnîşan kir ku Rûsya bi israr e ku bibe beşeke Komploya Navneteweyî.

DÊRIK

Li Dêrikê ji bo şehîdên bombebarana dawîn a li dijî Navenda Hêzên Ewlekariya Hundirîn a li gundê Koçerat, şîn hate ragihandin û bi boneya Komploya Navneteweyî, dikan jî hatin girtin.

Bi hezaran şêniyên bajêr, navçeyên Girkê Legê, Til Koçer û Çilaxa meşiyan.

Meş ji pêşiya geraca bajêr dest pê kir û li sûka navendî rawestiya. Li wir endamê Partiya Yekitiya Demokratîk (PYD) şaxê Dêrikê Ciwan Hesen axivî û Komploya Navneteweyî ya li dijî Rêberê Gelê Kurd Abdullah Ocalan şermezar kir.

Ciwan Hesen got berxwedana li Îmraliyê û xwedîderketina li felsefeya Rêberê Gelê Kurd Abdullah Ocalan ji aliyê gelan ve, komplo têk bir û wiha domand: “Felsefeya Rêber Abdullah Ocalan, ji bo gelên Rojhilata Navîn mîras e da ku li ser wê tê bikoşin û azadiya xwe bi dest bixin.”

Her wiha Hesen diyar kir ku êrişkirin û dagirkirina Serêkaniyê û Girê Spî berdewama armancên komploya navneteweyî ye.

Hesen anî ziman ku tu kes nikare gelên herêmê ji rêgeza Rêberê Gelê Kurd Abdullah Ocalan dûr bixe, wê di oxira parastina wî û destkeftiyên şoreşê de fedakariyên bikin.

Endama Kongra Star Firyal Qesûm jî soza mezinkirina têkoşînê li ser fikr û felsefeya Rêber Abdullah Ocalan heta pêkanîna azadiya wî ya fîzîkî û aştiyê li cîhanê da.