Bi sedan şêniyên navçeya Amûdê ya girêdayî kantona Qamişlo bi merasîmekê bi heybet cenazeyê şervanê QSD`ê Welîd Xalid (Welîd Hesekê) û Mihemed Salih (Hemê Reş) ku di Berxwedana Rûmetê de şehîd bûne li Goristana Şehîd Îsmaîl veşart.

Şêniyan cenazeyê her du şehîdan ji Saziya Malbatên Şehîdan a navçeya Amûdê wergirtin û ber bi goristanê ve meşiyan.

Li goristanê merasîm bi rêzgirtin dest pê kir. Paşê ji fermandarên QSD`ê Şîlan Elend axivî û îşaret bi rola têkoşîna şêniyên Bakur û Rohilatê Sûriyê di parastina ewlehî û aramiya herêmê de kir.

Şîlan diyar kir ku gelek hewldan li dijî gelên herêmê hatin kirin, armanca wan ku îradeya gel bişkînin û aramî û ewlehiya herêmê tevlîhev bikin û wiha dawî li axaftina xwe anî:"Lê hemû hewldanên dagirkeran û hewldanên dewleta Tirk têk çûn. Me çawa DAIŞ`ê têk bir em ê çeteyên Tirkiyê têk bibin."

Paşê wesîqeta şehadeta her du şehîdan ji aliyê Saziya Malbatên Şehîdan ve hat xwendin û radestî malbatên wan hat kirin. Di dawiyê de cenazeyê her du şehîdan di nava tilîlî û dirûşmeyên dilsozya bi şehîdan re hatin veşartin.