Cenazeyê endama Yekitiya Jinên Ciwan Emîne Mihemed (Nûjiyan Ocalan) di encama bomebebarana dewleta Tirk a dagirker a li Kobanê de di 25’ê Kanûnê de bi 4 hevalên xwe re şehîd bû, li goristana Şehîdên Berxwedana Serdemê ya navçeya Ehrezê ji aliyê hezaran kesî hate oxirkirin. Cenazeyê Nûjiyan Ocalan ji nexweşxaneya Avîn ya Kantona Şehbayê hate wergirtin û bi karwanekî ber bi goristana Şehîdên Berxwedana Serdemê ya navçeya Ehrezê ve ketin rê.

Bi tevlîbûna hezaran kesî li goristanê merasîmeke hate lidarxistin. Di merasîmê de endama Rêveberiya Meclîsa Malbatên Şehîdan a Kantona Şehbayê Menal Şêxo sersaxî ji malbata Nûjiyan û tevahiya gelê herêma Efrînê re xwest.

‘JI BO BERXWEDANA ME BIŞKÎNE ÊRÎŞ DIKE‘

Şêxo diyar kir ku dewleta Tirk a dagirker bi hemû rêbazan dixwaze berxwedana me lewaz bike û got: “Bi hemû rêbazan dagirker êrîşî li ser Kurdan dike. Li Efrînê bi rojane dagirker sûcên şer dike. Bênavber êrîşî welatiyên sivîl de û sivîlan qetil dike. Em bang li rêxistinên mafên mirovî û hiquqnas dikin ku bi erka xwe ya mirovî rabin, hesab ji dewleta Tirk a dagirker bixwazin û wê ji herêmên Sûriyê yên dagirkirî derxe."

Endamê Komîteya Perwerdeya Civaka Demokratîk Avdar Elo nasnameya şehîd Nûjiyan xwend û radestî malbatê kir. Cenazeyê şehîd di nava tilîliyên dayikan de hate veşartin.

Meresim bi dirûşmeyên “Şehîd namirin“ bi dawî bû.