Bi sedan kes û endamên saziyên sivîl, ji bo veşartina şervanê Hêzên Sûriyeya Demokratîk (QSD) Fadil El Hemade hatin ba hev. Fadil El Hemade (Şivan), 29’ê Çileyê di êrîşa dewleta Tirk a dagirker a li dijî gundê Tirwaziye yê Eyn Îsayê de şehîd bû.

‘EWLEKARIYA ME BI XÊRA ŞEHÎDAN E’

Endamê Meclîsa Malbatên Şehîdan a Şedadêyê Hîbe El Ebdullah bi xwestina sersaxiyê ji malbata şehîd re dest bi axavtina xwe kir û got: “Ewlekariya me bi xêra bi hezaran şehîdan e. Divê em li gor berpirsyariya şehîdan daye me, tevbigerin û li destkeftiyan bibin xwedî.“

Cesûr Amûdê ku fermandarekê QSD’ê ye, wiha got: “Hem jiyan hem jî şehadeta Şehîd Fadil bi mêrxasî bû. Ji bo parastina welatê xwe li eniya herî pêş şer kir û canê xwe kir gorî. Em soz didin ku em ê bi rêya ku wan ronî kiriye de biçin.“

Piştî axavtinê, endamê Meclîsa Malbatên Şehîdan Îman El Ferec belgeya şehadetê ya şehîd xwend û da malbatê.

Cenazeyê Şehîd Fadil El Hemade (Şivan) bi tilîliyan hat veşartin.