Bi sedan şêniyên Efrîn û Şehbayê cenazeyê şervanê Hêzên Rizgariya Efrînê (HRE) Xelîl Hiso (Şiyar Denîz) ê 25’ê Tebaxa 2021’an li herêma Efrînê dema li ser erka xwe bû şehîd bû, veşartin.

Girse cenazeyê şehîd ji pêşiya nexweşxaneya Avrîn a bajarokê Fafînê wergirtin û bi karwanekî ber bi Goristana Berxwedana Serdemê ya li navçeya Ehrisê ya Kantona Şehbayê ve ketin rê.

Merasîm bi deqeyeke rêzgirtin destpê kir. Piştre ji rêveberên Meclîsa Malbatên Şehîdan a Kantona Efrînê Xedîce Îbo sersaxî ji malbata şehîd re xwest û got: "Dema peyva şehîd tê gotin azadî û aştî tê bîra me. Dijmin jî bi hemû rêbazan êrîşî me dike da ku nehêle em bi azadî û rûmetî bijîn. Şehîd dibêje 'bêyî zarokên xwe dikarim bêjim lê nikarim bêyî welat bijîm'. Ev yek hêz û bawariya me xurttir dike." Xedîce soza şopandina xeta şehîdan da.

Li ser navê Rêveberiya Xweser a Herêma Efrînê, Hevserokê Desteya Ciwan û Werzîşê Mihemed Wesyî jî got: "Welat bi xwîna şehîdan tê avdan, ne wisa be em ê têk biçin. Madem fedekarên welat hene teqez em ê bi rûmet bijîn."

Endama Komîteya Perwerdeya Civaka Demokratîk a Kantona Efrînê Rûken Ehmed nasnameya şehîd xwend û radestî malbatê kir.

Bavê şehîd Şiyar, Murad Hiso diyar kir şehîd Şiyar  bê dudilî di pêkanîna erka xwe ya li hemberî welat de li pêş bû.

Di dawiya merasîmê de cenazeyê şehîd di nava diruşmeyan de hate veşartin.