Şêniyan cenazeyê şehîd Şaha Hisên (Şaha Dêrik) ji nexweşxaneya Dêrikê wergirtin û bi karwanekî wesayîtan ber bi goristana Şehîd Xebat Dêrik ve ketin rê.

Li merasîmê deqîqeyekê rêz hate girtin. Piştre endama Koordînasyona Kongreya Star Hêva Erebo sersaxî ji malbata şehîd Şaha û Tevgera Rizgariya Kurdistanê re xwest.

Hêva Erebo got: "Şehîd Şaha 30 sal di nava Tevgera Rizgariya Kurdistanê de têkoşiye û mîraseke têkoşînê ji gelê xwe bi taybet ji jinan re hişt."

Di merasîmê de, Hevseroka Meclisa Rêveber a Rêveberiya Xweser a Herêma Efrînê Şîraz Hemo jî ev tişt diyar kir: "Şehîd Şaha mohra xwe li cem gelên Bakur û Rojhilatê Sûriyeyê, bi taybet li cem şêniyên Efrînê û Şehbayê hişt ku bi giyanê wê yê têkoşer ve hatibûn girêdan."

Şîraz Hemo destnîşan kir ku şehîd Şaha di temenê xwe yê biçûk de dest bi têkoşînê kir û bi giyanê jina pêşeng têkoşiya û xeta xwe ya têkoşînê bi şehadetê oxir kir.

Piştre peyama sersaxiyê ya Meclisa Malbatên Şehîdan a Wargeha Penaberan a Şehîd Rustem Cûdî ya Mexmûrê hate xwendin. Di peyamê de hate gotin: "Her zarokek penaber li wargeha Şehîd Rustem Cûdî bi saya şehîd Şaha fêrî zimanê dayikê bûn heta bûn şervan û gihiştin asta şehadetê. Em soz didin şehîd Şaha ku bi tevlêbûna bi dehan keç û xort nava Tevgera Rizgariya Kurdistanê wê xeta wê ya têkoşînê her tim zindî be.

Piştî axaftinan nasnameya şehîd Şaha hate xwendin û radestî malbatê hate kirin. Malbatê soza şopandina xeta şehîdan da.

Cenazeyê şehîd Şaha di nava dirûşmeyên dilsoziya bi şehîdan re û tilîliyên dayikan hate veşartin.