Koordînasyona Giştî ya Yekîtiya Ragihandina Demokratîk (YRD) bi minasebeta 22’yê Nîsanê Roja Rojnamegeriya Kurd, daxuyaniyeke nivîskî weşand. Di daxuyaniyê de 22’yê Nîsanê li hemû rojnamegeran hat pîrozkirin û şehîdên çapemeniyê hatin bibîranîn.

Daxuyanî wiha ye:

"22’yê Nîsana sala 1898’an Rojnameya Kurdistan hat derxistin û ji bo rojnamegeriya li Kurdistanê gav hat avêtin.  Rojnameya Kurdistan jî Kurdên ku welatê wan hatiye dagirkirin û hatine sirgunkirin, li Qahireyê li sirguniyê dest bi weşana xwe kir. Rojname piştre li navendên wekî Stenbol û Şamê weşana xwe domand û piştî çend hejmaran weşana wê hat rawestandin.

Piştî rojnameya Kurdistan gelek rojname û kovar hatin derxistin. Bi derketina Tevgera Azadiya Kurdistanê re, wekî her qadek jiyanê, di qada çapemeniya azadîxwaz û alternatîf de gavên gelekî girîng hatin avêtin. Çawa ku di qadên din ên têkoşînê de bedelên mezin hatin dayîn û nirx hatin afirandin, di qada çapemeniya azad de jî bedelên mezin hatin dayîn. Bi têkoşîna pîroz û bedelên mezin nirxên giranbuha hatin afirandin. Rojnamevaniya Kurd ku wekî Kevneşopiya Çapemeniya Azad tê pênasekirin, bi vî rengî ji aliyê hemû cîhanê ve wekî çavkaniyek rastiyên herêmê hat pejirandin.

Bi têkoşîna Çapemeniya Azad re, şahidiya duryanên girîng ê dîroka têkoşîna Kurd jî hat kirin. Her wiha feraseta çapemeniya alternatîf daye qebûlkirin. Ev nirxên giranbuha hemû bi saya keda mezin a pêşeng û şehîdên çapemeniyê hatine afirandin. Ji Gurbetellî Ersoz, Halîl Dag, Mûsa Anter, Denîz Firat, Nûjiyan Erhan heta şehîdên dawî yên ku dema berxwedana Efrînê dişopandin gihîştin şehadetê bi sedan hevalên me bê tirs û cesaretek mezin bûn deng û rengê heqîqetê. Di warê rojname, radyo, televîzyon, ajans û gelek warên din ên çapemeniyê de pêngavên destpêkê avêtin, bûn mînak. Tarîtî ronî kirin, rûpoşên zordar ên Dehaqan daxistin. Bi vî rengî jî mohra xwe li dîrokê xistin.

Bi minasebeta 22’yê Nîsanê Roja Rojnamegeriya Kurd, em careke din hemû şehîdên çapemeniyê bi bîr tînin, soza şopandina rêya wan dubare dikin. Her wiha em vê rojê li tevahiya rojnamevanên Kurd û rojnamevanên ku keda wan di rojnamevaniya Kurd de heye pîroz dikin, di xebatên wan de serkeftinê dixwazin.”