Parlamenterê Partiya Çep û Berpirsyarê Polîtîka Derve Hakan Svennelîng û Parlamentera Partiya Çep Amîneh Kakabaveh, li ser rewşa parlamenterên HDP'ê yên girtî û grevên birçîbûnê pêşnûme pirsek beriya niha pêşkêş kiribûn. Wezîra Karên Derve ya Swêdê Margot Wallstrom jî bersiv da pirsên parlamenterên Partiya Çep û got, divê destûr bê dayin ku siyasetmedarên hatine hilbijartin wezîfeya xwe ya demokratîk li parlamentê bidomînin.

Wallstrom ragihand, hikumeta Swêdê bi tirs û fikar rewşa li Tirkiyeyê dişopîne û her cara bi rayedarên Tirk re rûdinên, balê dikişînin ser mûxalefeta azad û pirrengiya medyayê ku şertekî sîstema demokratîk e.

Wallstrom diyar kir, ji bo karibin encamê ji van hewldanan bigirin wan binpêkirina mafên mirovan a li Tirkiyeyê xistine rojeva platformên navneteweyî û wiha dewam kir: "Em balê dikişînin ser rewşa siyasetmedar, rojnamevan, akademîsyen û nûnerên civaka sivîl ên mûxalîf û welatên Yekîtiya Ewropayê teşwîq dikin ku ji bo li Tirkikyeyê hurmet ji pîvana dewleta hiqûqê û mafên mirovan re bê nîşandan, bikevin nava hewldanan."

Wallstrom ragihand, nûnerên Swêdê yên li Tirkiyeyê rûniştinên dozên mûxalîf û rêveberên HDP'ê yên girtî dişopînin û teşwîq dikin ku welatên din jî heman tiştî bikin.

DIVÊ OCALAN Û GIRTIYÊN SIYASÎ WERIN BERDAN

Parlamentera Partiya Çep Amîneh Kakabaveh bersiv da pirsên me yên li ser mijarê û anî ziman, Wallstrom bersiveke berbiçav nedaye pirsên wan.

Kakabaveh bi bîr xist, di pêşnûme pirsê de li ser rakirina tecrîdkirina Abdullah Ocalan û grevên birçîbûnê yên Leyla Guven û girtiyên din de pirs ji Wallstrom pirsîne û got, "Wallstrom dibêje ku di hevdîtinên bi rayedarên Tirk re wan mijar nirxandine. Girîng e ku Swêdê ev kiriye, lê belê divê ji bo rakirina tecrîdê bikeve nava hewldanên berbiçav."

Kakabaveh anî ziman, Ocalan lîderê partiyeke siyasî ye ku destekê ji gel digire û 20 sal in li giravekê girtî ye û got, "Mafên ku ji girtiyan hemûyan re tên naskirin divê ji bo Ocalan jî derbas bibin. Her wiha bi dîtina min divê Ocalan bê berdan. Divê Ocalan û girtiyên siyasî hemû werin berdan."