Di 31’ê Gulanê de leşkerên Tirk li bejahiya gundê Korgana Şemzînana Colemêrgê, êşkence li gundiyan kir. Leşkeran bi qûndaxên çekan li gundiyan dan û gelek caran serê wan xistin avê û derxistin.

Baroyên Amed, Wan û Colemêrgê têkildarî vê êşkenceyê heyetek ava kir û çavdêriyên xwe kir rapor.

Heyetê ji ber êşkenceya li ser 4 kesan bi mexdûran re civiya. Heyetê xwest bi Serdozgeriya Komarê ya Şemzînanê jî hevdîtinekê bike, lê ev daxwaz hate redkirin.

TESPÎT

Heyetê di raporê de cih da van tespîtan:

“1- Êşkence li bejahiya gundê Korganê hatiye kirin û ev der ne ‘herêmeke qedexe ye’.

2- 5 kesên ku êşkence kirine yek jê rayedar e û ji bareha leşkerî ya li herêmê hatine.

3- Êşkence ne li 2 kesan, li 4 kesan hatiye kirin

4- Nasir Taş, Ramazan Aktaş, Îsmaîl Erebî û Mûhsîn çavşî bi dar û qûndaxên tivingan hatine derbkirin. Leşkeran gelek caran serê Nasir Taş xistine avê û derxistine.

5-Nasir Taş bi giranî birîndar bûye û bi derfetên xizmên birîndar ew rakirine nexweşxaneyê. Leşkeran ji xizmên Taş re gotine ku ‘Me terorîstek kuşt, biçin wî bînin.’

6- Bêrîvanên gund û xizmên birîndaran dema ku xwestine biçin cihê bûyerê, heqaret li wan hatiye kirin û gef li wan hatiye xwarin.

7- Kesên ku êşkence kirine ji aliyê mexdûran ve hatine teşxîskirin.

8-Ewraqên di dosyeya lêpirsînê de ligel daxwaza parêzeran nehatiye teslîmkirin.

9-Leşkerên êşkencekar ligel ku hatine teşxîskirin jî hê nehatine destgîrkirin û li ser karê xwe ne.

ENCAM Û PÊŞNIYAZ

Di beşa encam û pêşniyaza raporê de tê diyarkirin ku îfadeya şahidên bûyerê nehatiye stendin, mînaka dosyeya lêpirsînê pêşkêşî parêzerên mexdûran nehatiye kirin, mexdûrên ku bi Tirkî nizanin jî bêyî wergêr û parêzer beyana wan hatiye stendin.

Heyetê xwest ku têkildarî kiryaran divê biryara girtinê were dayîn, lêpirsîneke îdarî were vekirin û heta ku ev lêpirsîn bi encam bibe divê kesên êşkencekar peywira wan were sekinandin, ji bo kesên mexdûr divê şertên tedawiya fizîkî û psîkolojîk were avakirin. Heyetê bang li hikumetê kir ku ji bo ku bûyerên bi vî rengî çênebe, bila îradeyeke xurt derxe holê.