Nobeda ji Ocalan re Azadî, ji 25'ê Hezîrana 2012'an û vir ve li pêşberî avahiyên Konseya Ewropayê, Dadgeha Mafên Mirovan a Ewropayê û Komîteya Pêşîgirtina li Îşkenceyê ya Konseya Ewropayê tê girtin.

Nobeda vê hefteyê ji aliyê gelek endamên Komîteya Malbatên Şehîdan ên ji Fransa û Elmanyayê ve tê girtin.

BI RENGEKÎ DORVEGER, GELEK MALBATÊN ŞEHÎDAN TEVLÎ ÇALAKIYÊ DIBIN

Malbatên şehîdan ên li bajarê Strasboûrg ê Fransayê, bajarên Saarbrucken, Heîlbronn, Offenbûrg û Freîbûrg ên Elmanyayê, ji roja Yekşemê û vir ve bi rengekî dorvegere nobedê digirin. Bavê yek ji kadroyên PKK'ê Hamza Yavûz ê di sala 2000'î de jiyana xwe ji dest da Hecî Ekrem Yavûz jî tevlî çalakiyê bû.

Tevî endamên Komîteya Malbatên Şehîda li Strasboûrgê Aysel Alacaçayir, Dûran Agaç û Fîdan Agaç, ji bajarê Heîlbronn ê Elmanyayê Omer Çinar jî duh tevahiya rojê nobed girtin. Roja Çarşemê jî xizmên şehîdan ên ji bajarên Offenbûrg û Freîbûrgê hatin, nobed girtin.

BANGA 'BILA OCALAN Û HEMÛ SIYASETMEDARÊN GIRTÎ WERIN BERDAN'

Tê payîn, îro jî komek ji Elmanyayê beşdarî çalakiyê bibe. Berdevkê komê Dûran Agaç li ser nobedê agahî da û diyar kir, ji bo azadiya Ocalan û hemû girtiyên siyasî yên li zîndanan, ew çalakiyê lidar dixin.

Dûran Agaç ji CPT xwest, bikeve nava hewldanan, biçe serdana Ocalan û êdî tecrîdê rake. Agaç her wiha xwest, nûnerên siyasî yên gelê Kurd, ku di operasyonên dijî HDP û DBP'ê de hatin girtin, bên berdan.

Dûran Ağaç da xuyakirin, ku ji bo bidawîbûna şer û komkujiyan, divê hewldaneke lezgîn bê destpêkirin û ji bo aştiyeke bi rûmet, muzakere ji nû ve dest pê bikin.

BANG PIŞTGIRIYÊ LI GEL HATE KIRIN

Dûran Agaç bang li gelê Kurd û dostên wan ên li Ewropayê bi taybetî li Strasboûrgê dijîn kir, ku destekê bidin çalakiyên ji bo azadiya Ocalan. Agaç xwest, daxwaza azadiya Ocalan li hemû qadên Ewropayê deng vede.