Li Taxa Melîkahmet ji aliyê Şaredariya Sûrê ve parkek hate vekirin. Hevşaredarê Bajarê Mezin yê Amedê Selçûk Mizrakli, Parlamenterên HDP’ê û Hevşaredarên Sûrê beşdarî vekirina parkê bûn.

Welatiyên taxê eleqeyek mezin nîşanî Mizrakli dan. Hevşaredarê Sûrê Cemal Ozdemîr di vekirina parkê de axivî û diyar kir ku 12 roj in li dijî tayînkirina qeyûm liberxwe didin û heta gav paşve neavêjin ew ê têkoşîna xwe bidomînin.

Hevşaredar Fîlîz Bûlûttekîn jî got li dijî tayînkirina qeyûm ew ê bi xizmetê bersivê bidin.

Parlamentera HDP’ê ya Amedê Salîha Aydenîz jî got ew ê bi gel re têbikoşin û wiha domand; “Em li kolan in. Em ê dev ji kolan an ne berdin. Em ê tu caran neqûlkirina vê îradeyê qebûl nekin. Berxwedana me ya li dijî qeyûm didome, şaredariyên me jî kar dikin.”

Hevşaredarê Bajarê Mezin yê Amedê Selçûk Mizrakli jî axivî û wiha got; “Ji bo keyfxweşiya zarokên ku pêşeroja me ne em ê kar bikin. Em bi qadên jiyanê re dijîn. Bi jin, zarok, ciwan û kalan re em ê qadên xwe yên jiyanê nehêlin. Em xwe spart vî gelî. Bila ew li pişt blokên beton û zirxiyan xwe veşêrin. Em ê qezenç bikin. Bi teqez em ê serbikevin.”