Di çarçoveya banga 'Aştî û Civaka Demokratîk' de Rêber Abdullah Ocalan di 18'ê Adarê de  peyameke girîng ji bo civaka Êzidî şand. Ev peyam, ne tenê silavkirineke berxwedana Êzidiyan a li Şengalê ye, lê di heman demê de rêgezek ji bo paşerojeke ewle û bi rûmet ji bo Êzidiyan nîşan dide.  Ev peyam gelekî girîng e û dikare aqûbeta paşeroja Êzidiyan diyar bike. Bingeha peyamê sîstema neteweya demokratîk û vejîna ronesansa Êzidiyan e.

Êzidî, tevî hemû zilm û zordariyê, bi biryardarî li hemberî hêzên tarî sekinîn û axa xwe parastin. Ev berxwedan, ne tenê parastina hebûna fizîkî bû, lê di heman demê de parastina çand, bawerî û nasnameya Êzidî bû. Rêber Ocalan di peyama xwe de, vê berxwedana dîrokî silav dike û diyar dike ku çawa Êzidiyan bi rihê berxwedanê yê kûr, xwe ji tunekirinê rizgar kirin. Ev berxwedan, ji bo tevahiya mirovahiyê bû dersek, li ser girîngiya berxwedana li dijî barbarî û pêwîstiya parastina cewherî a civakên herî qedîm.

NETEWEYA DEMOKRATÎK GARANTIAY PAŞEROJEKE EWLE YE

Peyama Rêber Ocalan, girîngiya sîstema neteweya demokratîk ji bo Êzidiyan gelekî zelal dike. Li cîhaneke ku civakên biçûk û kêmneteweyî bi gelemperî rastî zext û înkarkirinê tên, neteweya demokratîk modela herî guncaw e ji bo parastina maf û azadiya wan. Ev sîstem, li ser bingeha rêveberiya xweser e, jiyana xwe ji aliyê civakê ve bi rê ve dibe û pêşî li her cûre destwerdanên derve digire. Ji bo Êzidiyan, ku di dîroka xwe de gelek ferman û komkujî dîtine, xweseriya demokratîk garantiyek e ku ew ê careke din neyên qurbana êrîşan. Ev sîstem, rê dide Êzidiyan ku ew bi azadî bawerî, çand û zimanê xwe biparêzin û bi pêş bixin û li ser bingeha nirxên xwe, civakeke azad û xweser ava bikin.

PÊŞÎGIRTINA FERMANAN Û VEJÎNA RONESANSA ÊZIDÎ

Di peyama xwe de Rêber Ocalan cih dide  girîngiya pêşîgirtina li fermanan, ji ber ku fermana li ser Êzidiyan, ne tenê êrîşeke hovane bû, lê di heman demê de encama nebûna sîstemeke parastinê ya xurt bû. Rêber Ocalan destnîşan dike ku rêxistinbûna civakî û xweseriya demokratîk, mifteya sereke ya pêşîgirtina li fermanên paşerojê ye. Dema ku civakek bi rêxistin be, xwedî hêza biryardanê be û karibe xwe biparêze, tu hêz nikare wê tune bike.

Lê belê, pêşîgirtina fermanan ne tenê bi parastina fîzîkî pêk tê, di heman demê de bi vejîna Ronesansa Êzidî jî. Ronensas, vejîn û nûjenkirina çand, ziman, bawerî û nirxên Êzidî ye. Ev tê wateya vegerandina koka xwe, xurtkirina nasnameya xwe û bi vê re, pêşîlêgirtina helandina di nava civakên din de.

Rêber Apo Êzidiyan teşwîq dike ku dîrok, mîtolojî û felsefeya xwe ya dewlemend ji nû ve kifş bikin û pêş bixin. Ev ronesans, ne tenê vejînek li paşerojê ye, lê nêrînek li pêşerojê ye ku li ser bingeha nirxên hemdem û gerdûnî, paşerojeke bihêz û xweser ava bike. Daxwaza  Rêber Ocalan a ji bo mezinbûna rêxistina Êzidiyan, ne daxwazeke siyasî ye, di heman demê de pêwîstiyeke jiyanî ye ku bingeha vê ronesansê ava dike.

Di encamê de, peyama Rêber Abdullah Ocalan ji bo Êzidiyan, ne tenê silaveke ji bo berxwedaneke lehengî ye, di heman demê de rêgezeke stratejîk e ji bo paşerojeke bi ewle û azad. Bi rêxistinbûna xweser, pêşxistina sîstema neteweya demokratîk, vejîna Ronesansa Êzidî û bi biryardariya parastina nirxên xwe, Êzidî dikarin fermanên paşerojê asteng bikin û jiyaneke bi rûmet û azad ji xwe re ava bikin. Ev peyam, hêvî û moraleke mezin dide Êzidiyan, û wan teşwîq dike ku rêxistinbûna xwe xurtir bikin û ji bo pêşerojeke baştir bixebitin.