Mîtînga 1’ê Gulanê Cejna Karkeran a li navçeya Maltepeyê ya Stenbolê bi tevlêbûna bi sed hezaran kesan dest pê kir. Partiyên siyasî, saziyên sivîl ên civakî, hunermend û nivîskar tevlî mîtîngê bûn.

Hevberdeka HDK’ê Gulistan Kiliç Koçyîgît jî tevî kortejê tevlî qada mîtîngê bû û ÎHD’ê pankarta ji bo girtiyên nexweş hilda.

‘HDP LI SER PÊYAN E!’

Di korteja HDP’ê de jî sloganên ‘Bijî Serok Apo’ û ‘HDP hêvî ye, hêvî li ser pêyan e’ hate qîrkirin. Hevseroka Giştî ya HDP’ê Pervîn Bûldan jî di protokolê de cihê xwe stend.

‘EM ŞER Û DÎKTATORIYÊ RED DIKIN’

Di mîtîngê de jinan li hemberî tacîza sîstematîk dengê xwe bilind kirin. Înîsiyatîfa Xwendekaran jî bi slogana ‘Em şer, zext û dîktatoriyê red dikin’ ketin qadê.

Di qadê de wêneyên Berkîn Elvan û Alî Îsmaîl Korkmaz hatin hildan ên ku di dema Çalakiyên Geziyê de hatibûn qetilkirin.