Li Ewropayê, çalakiyên ji bo xwedîderktina li berxwedana grevên birçîbûnê dewam dikin.

LYON: Li bajarê Lyon ê Fransayê, bi namzetê Serokkomariyê yê Partiya Antî Kapîtalîst a Nû Phîlîppe Poûtoû re hevdîtin hate kirin. Ev hevdîtin li Komeleya Mezopotamyayê pêk hat û li ser grevên birçîbûnê yên bêdem-bêdorveger agahî hate dayîn. Der barê mijarê de dosyayek radestî Poûtoû hate kirin.

DÛÎSBÛRG:  Li bajarê Dûîsbûrg ê Elmanyayê, Meclîsa Jinê ya Şehîd Asya Yuksel û Navenda Civaka demokratîk a Kurd (NCDK) ve mîtîngek hate lidarxistin. ATÎF, AGÎF, Însiyatîfa Gel a Kuercîkê jî destek dan mîtîngê. Di mîtîngê de ku bi sedan Kurdistanî amade bûn, bi zimanên Kurdî, Elmanî û Tirkî li ser grevên birçîbûnê axaftin hate kirin. Hat destnîşankirin, ku grevên birçîbûnê berxwedana li dijî neheqiyê ye û bang li raya giştî hate kirin, ku bi berpirsyarî rabe. Çalakî bi qîrîna dirûşmên "Girtî rûmeta me ne", "Bi zindana werin valakirin", "Jin jiyan azadî" û "Bijî Serok Apo" qediya.

MARSÎLYA: Li bajarê Marsîlya yê Fransayê, Kurdistanî ji bo balê bikişînin ser grevên birçîbûnê yên li girtîgehan, li meydana Canebîerreyê dest bi greva birçîbûnê kirin. Di çalakiyê de konê agahdarkirinê hat vedan û gelek belavok hatin belavkirin.

ROÛEN: Bi armanca destekkirina grevên birçîbûnê yên li girtîgehan, li bajarê Roûen ê Fransayê çalakî hate lidarxistin. Kurdistaniyên li ber Navenda Civaka Demokratîk a Kurd li hev civiyan, heta ber Şaredariya Roûenê meşiyan. Çalakgeran belavok belav kirin, bal kişandin ser grevên birçîbûnê û ji raya giştî xwestin, ku bi berpirsyarî tevbigere.

MUNCHEN: Li bajarê Munchenê Elmanyayê nobeda kon dest pê kir. Li vê derê daxuyaniyek hate dayîn û hat ragihandin, tecrîda li ser Rêberê Gelê Kurd nayê qebûlkirin û bal hat kişandin ser zext û zordariya li girtiyên siyasî tê kirin. Bang li dewleta Tirk jî hat kirin, ku daxwazên însanî û mafdar ên çalakgerên di grevên birçîbûnê de ne, qebûl bike. Çalakiya li vir wê 4 rojan dewam bike. Di 13-14'ê Nîsanê de wê konê agahdarkirinê li Max-Josepfplatzê bê vedan û mîtîngek were lidarxistin.