Li paytexta Elmanya Berlînê, sendîka, saziyên şoreşger û rêxistinên aştiyê bi mîtîngekê 1'ê Îlonê Roja Aştiya Cîhanê pîroz kirin.

Mîtîng li Brandenbûrger Tor hat lidarxistin. Kurd di bin pêşengtiya NAV-DEM'ê de bi sembolên neteweyî û wêneyên Rêberê Gelê Kurd Abdullah Ocalan tevlî mîtîngê bûn.

Di dema mîtîngê de polîsên Elman sembola Tevgera Jinên Kurd weke hincet nîşan da û 3 Kurdistaniyên ku yek ji wan jin e binçav kir. Di mîtîngê de ji aliyê nûnerên saziyan ve bêtehamûla li dijî sembol û rengên Kurdan hate şermezarkirin. Piştre çalakgerên ku hatibûn binçavkirin, hatin berdan.

HANNOVER

Li bajarê Hannover ê Elmanyayê bi boneya 1'ê Îlonê roja Aştiya Cîhanê di bin pêşengtiya Navenda Civaka Demokratîk a Kurd (NCDK) mîtînga 'Ji Ocalan re Azadî' hate lidarxistin.

Mîtînga ku li navenda Honnberê pêkhatî de pankarta mezin a bi nivîsa 'Ji Ocalan re azadî' hate vekirin û çalakgeran bê navber dirûşmeyên dilsoziyê berz kirin û tecrîda li ser Ocalan û gelê Kurd protesto kirin.

Di çalakiyê de Hevserokê NAV-DEM'ê Tahîr Koçer û Hevseroka NCDK'Ê Ciwan Çewlîk axivîn.

Di çalakiyê de belavokeke ku bi manşeta "Cihê bûyerê Kurdistan e" (Tatort Kurdistan) hate xwendin û fabrîqeya tangan a ku li Rehîn Metal wê li Tirkiyeyê ava bike jî hate prostestokirin.