Li paytexta Swêd Stockholmê, ji bo rakirina tecrîda li ser Rêberê Gelê Kurd Abdullah Ocalan çalakiyên jinan dewam dikin. Jinan çavên xwe bi bantê girê dan û bi çalakiya rûniştinê tecrîd şermezar kirin.

Di çalakiya li meydana Sergel de jinan bêdengiya cîhana derve ya li pêşberî tecrîda li ser Ocalan û komkujiyên dewleta Tirk li Bakur û Rojavayê Kurdistanê dike, hat protestokirin.

Çalakî li ser banga Meclîsa Jinên Kurd Amara hat lidarxistin û tevî pankarta bi nivîsa "Ji Ocalan re azadî, ji Kurdistanê re aştî" wêneyên Ocalan hatin hildan.

Çalakgeran li ser mijarê belavok belav kirin û bang li hikûmetên Yekîtiya Ewropayê û rêxistinên civaka sivîl kirin, ku ji bo Ocalan bikevin nava tevgerê.

Jinan dan xuyakirin, ku heta Ocalan azad bibe, ew ê çalakiyên xwe bi berfirehî dewam bikin.

PARÎS

Kurdên li herêma Evry ya paytexta Fransa Parîsê, tecrîda li ser Rêberê Gelê Kurd Abdullah Ocalan û êrîşên li ser Rojavayê Kurdistanê şermezar kirin. 

Kurdistaniyên li ber Navenda Civaka Demokratîk a Kurd a Evry li hev civiyan, heta Gara Grîgny meşiyan. Di meşê de dowîz û pankartên bi nivîsa "Ji Ocalan re azadî" hatin hildan.

Di dema meşê de dirûşmên "Kujer Tirkiye", "Kujer Erdogan" hatin qîrîn.