Konferans li Zanîngeha Hambûrgê tê lidarxistin û bi dehan qiseker ji herêmên cuda yên cîhanê lê amade ne. Konferansa ku saet di 10:00 de dest pê kir wê 3 rojan bidome. Ji saet 08:00 û pê ve beşdar hatin salona konferansê, qeyda xwe çêkirin û li stantên ku pirtûkên Rêberê Gelê Kurd Abdullah Ocalan ên bi gelek zimanan hatine wergerandin lê ne, geriyan.

Kesayetên anarşîst, femînîst, komunîst, hawirdorparêz û tevgerên civakî, her wiha teorîsyenên çepgir tevlî konferansê bûne.

KONFERANS WÊ 3 ROJAN BIDOME

Di konferansê de wê li dora nêrînên Rêberê Gelê Kurd Abdullah Ocalan, li ser mijarên parçekirina feraseta şaristaniya kapîtalîst, alternatîfên derveyî dewletê, şêweyên avakirinê û perspektîfên siberojê nîqaş werin kirin.

Di nava qisekeran de teorîsyenê anarşîst Davîd Graeber, profesorê civaknasiyê Frank Adloff, nivîskar û aktîvîst Rahîla Gûpta, nivîskar Sîlke, ekonomîst û dîroknas Frîederîke Habermann, keça Mûrray Boockchîn Debbîe Bookchîn, rojnamevan û pisporê tevgerên civakî Raûl Zîbechî û Hevserokê PYD'ê Salih Muslim jî hene.

Konferans wê heta êvara Yekşemê dewam bike.