Jinên Kurd ên li bajarê Bordeaux a Franseyê dijîn, li ber dadgehê kom bûn û xwestin komkujiya 9’ê çile li Parîsê pêk hat û di encamê de 3 jinên Kurd hatin qetilkirin bê ronîkirin. Çalakî ji niha û pêve dê her rojên pênçşemê bê lidarxistin.

Jinên Kurd ên li Bordeauxê dijîn li ber dadgehên Franseyê ji bo sê jinên Kurd ên li Parîsê hatin qetilkirin dest bi nobetê kirin.

Jinên Kurd dê ji niha û pêve her hefte li ber  dadgeha Bordeauxê  ji bo sê jinên Kurd ên siyasetmedar Sakîne Cansiz, Fîdan Dogan û Leyla Şaylemez ên li Parîsê hatin qetilkirin bi dirûşima “Em edaletê dixwazin” nobeta dadê li dar bixin.

Çalakiya roja pênçşemê li ber Dadgeha Bordeauxê saet di 14.00-15.00 de dest pê kir û li gel hewaya sar 50 jin beşdar bûn.

Di daxuyaniyên hatin dayin de ji dewleta Franseyê hate xwestin ku demek beriya demekê komkujiya Parîsê ronî bikin.