Ji aliyekî ve namzetê Serokkomariyê Selahattîn Demîrtaş li girtîgehê bi rêya medya civakî kampanya hilbijartinê dike, li aliyê din HDP tevî êrîş û zordariyê jî li nava malan digere û xwe digihîne gel.

ŞIRNEX: Rêxistina HDP'ê ya Şirnexê li navçeyên Cizîr û Elkê karê hilbijaritnê dike. Namzetê HDP'ê yê parlamenteriyê Huseyîn Kaçmaz jî di nav de, komek ji endamên HDP'ê li yekane gundê Suryaniyan ê li Elkê, serdana gundê Geznexê kir. HDP'yî bi tilîlî û çepikan hate pêşwazîkirin. Namzet Nûran Îmîr jî li tax Nûr a Cizîrê serdana malan kir û got, "Îradeya me wijdan û dilê me ye. Dil û wijdanê me jî HDP ye."

EDENE: Namzetên HDP'ê yên Edeneyê Tulay Hatîmogûllari, Bêrîtan Onen, Turkan Bakir û Sever Ûzûr bi kincên gelêrî li nava bajêr belavok belav kirin. Namzetan li taxên Sarihamzali û Bahçelîevler ên navçeyên Seyhan û Yuregîrê buroyên hilbijartinê vekirin. Li taxa Hurriyetê ya navçeya Seyhanê bi beşdariya Tulay Hatîmogûllari şahiyeke jinan hate lidarxistin.

MERSÎN: Karê hilbiljartinê yê rêxistina HDP'ê ya Mersînê heta dernegiya şevê dewam kir. Li navçeyên Tarsûs, Akdenîz, Toroslar, Yenîşehîr û Mezîtliyê civînên gel, sedana komeleyan û şahî hatin kirin.

OSMANIYE: li Osmaniyeyê, namzetên HDP'ê yên parlamenteriyê Ahmet Eken, Derya Tûrhan û Muslum Çagan tevî rêveberên HDP û DBP'ê li taxa Yûnûs Emre xwarina fitarê dan. Di kombûnê de bang li welatiyan hate kirin ku xwedî li deng û sindoqan derkevin.

ANTALYA: li Antalyayê HDP'yiyan xwarina fitarê dan 5 hezar kesî. Namzetên HDP'ê yên Antalyayê û namzetê parlamenteriyê yê Îzmîrê nûrettîn Tûrgay jî tevlî bûn.

MANÎSA: Namzetên HDP'yî tevî parlamentera Bedlîsê ya HDP'yî Mizgîn Irgat serdana Komeleya Piştgirî û Çandê ya Bedlîsiyan kirin. Serokê komeleyê Cevdet Çîçek kêfxweşiya xwe ya ji ber serdanê anî ziman. Danê êvarê jî li taxa Tûrgût Ozal a li navçeya Yûnûs Emre bi beşdariya bi hezara nkesî mîtîngek hate kirin. Sirri Sakik li mîtîngê axivî û got, HDP ji bo têkoşîna demokrasiyê ya Tirkiyeyê alternatîfa yekane ye.

ÎZMÎR: Namzetên HDP'ê tamer Aydin, Serpîl Kemalbay, Mehmet Aker û Alîkara Hevserokên HDP'ê Sevtap Akdag li Îzmîrê serdana saziyên Elewiyan û Komeleya Colemêrgiyan kirin.

AYDIN:  Li navçeya Koşk a Aydinê, civîna gel hate lidarxistin. Di civînê de bang li dengdêran hate kirin ku destekê bidin HDP'ê û xwedî li sindoqan derkevin. Nametên HDP'yî piştî civînê li nava bajêr belavok belav kirin û daxwaza piştgiriyê ji esnaf û welatiyan kirin.

DÎLOK: Şahiya ciwanan a Meclîsa Ciwanên Dîlokê ya HDP'ê veguherî mîtîngê. Namzetê HDP'ê yê parlamenteriyê Mehmet Karayilan axivî û got, "Ev desthilatdariya dest bi xwîn nikare aştiyê bîne. Em ê aştiyê li vî welatî serdest bikin." Aktîvîsta TJA'yê Ayşe Gokkan jî destnîşan kir ku wê di 24'ê Hezîranê de hesab ji desthilatdariya ku bajarên Kurdan xera kir Û ciwanên Kurd bi saxî şewitand bipirsin.