HDP'ê qutbûna elektrîk û înternetê ya li Colemêrgê xist rojeva Meclîsê. Di pêşniyar pirsa HDP'ê de hat gotin, "Li cihên ku partiya me dengekî zêde bi dest dixe, gelo qutbûna înternet û elektrîkê rewşeke rasthatî ye?"

Parlamenterên HDP'ê yên Colemêrgê Nîhat Akdogan, Abdullah Zeydan û Selma Irmak, qutbûna elektrîk û înternetê ya li herêma Colemêrgê xistin rojeva Meclîsê.

'GEL BI ENDÎŞE YE'

Di pêşniyar pirsa ku pêşkêşî Serokwezîrê Tirk Ahmet Davûtoglû hat kirin de parlamenteran diya rkirin, ku qutbûna elektrîk û înternetê beriya hilbijartinê, di nava gel de li ser zelalî û ewlekariya hilbijartinê rê li ber endîşeyan vekiriye.

Parlamenteran gotin, "Ji bo ku nêrîna neyînî ya li ser hilbijartinan ji holê bê rakirin û pêşî li nerazîbûneke di nava raya giştî ya navneteweyî de li ser vê mijarê were girtin, em bang li hikûmeta we dikin ku bi cidiyet û berpirsyarî tevbigerin."

Parlamenterên Colemêrgê ji Davûtoglû xwestin bersiva van pirsan bide:

"Sparteyeke hiqûqî ya qutbûna elektrîk û xetên înternetê heye?

Eger hebe, li gorî kîjan madeyên qanûnê ev yek tê kirin? 

Bi qutkirina înterneta mobîl re, ku heman piştî rûdana bûyerên civakî derket holê û mafê agahîwergirtinê yê welatiyan binpê dike, çi tê xwestin?

Qedexeya weşana malperan ku heman piştî Komkujiya Pirsûsê ket rojevê û niha jî qutbûna xetên mobîl ên înternetê, ji aliyê we ve hatiye lêkolînkirin?

Bi taybetî li cihên partiya me dengekî bilind lê werdigire, gelo qutbûna elektrîk û xetên înternetê, rewşeke rasthatî ye?"