Dewleta ku fîrara 6 girtiyên siyasî yên li Girtîgeha Sergirtî ya Tîpa D a Amedê dike hincet, sirgûnkirina didomîne. Piştî 41 girtî hatin sirgûnkirin, beriya du rojan Dîren Yaşa û Ramazan Benîce jî sirgûnî Girtîgeha Tîpa F a Kandiraya Kocaelî kirin.

Her wiha êvara 6’ê Adarê dema 15 girtî ji Girtîgeha Tîpa T a Şirnexê sirgûnî Girtîgeha Sergirtî ya Tîpa E ya Trabzonê jî kirin, di wesayîta rîngê de derb kirin. Hate hînbûn ku rewşa Omer Kabûl, Dervîş Kilinç û Leşker Acar ji ber derbkirinê giran e.

‘TEVAHÎ GIRTÎ HATIN DERBKIRIN; ME NEBIRIN DOKTOR’

Girtî Sadik Aslan ê sirgûnî Girtîgeha Tîpa E ya Trabzonê hat kirin jî bi rêya telefonê agahî da malbata xwe. Aslan, anî ziman ku gardiyan ketin hucreyê û bi lêdanê ew ji hucreyê derxistin û li rîngê siwar kirin û sirgûn kirin. Aslan, da zanîn ku 3 rojan bi ringê çûn Trabzonê û di rê de rastî lêdanê hatin. Aslan, destnîşan kirin ku ti girtî neşandin doktor û ti girtiyan rapora lêdanê negirtine. 

Girtiyên sirgûnî Girtîgeha Tîpa E ya Trabzonê hatin kirin wiha ne: Derviş Kilinç, Mesut Şengîl, Huseyin Bozkurt, Îsmet Koluman, Şaban Bugdayci, Leşker Acar, Sadik Aslan, Ahmet Zenger, Remzi Akyurek, Şehmus Çîngu, Haci Haykir, Hasan Olmez, Îlhan Şayli, Refik Eren û Omer Kabul.

Ji RÎZEYÊ JÎ 2 GIRTÎ HATIN SIRGÛNKIRIN

Ji Girtîgeha Tîpa L a Kalkandereya Rîzeyê jî girtî Îbrahim Engîn û Huseyin Barsak sirgûnî Girtîgeha Tipa F a Boluyê hatin kirin.