Endamê Komîsyona Lêkolîna Mafên Mirovan û Parlamenterê HDP'ê yê Kocaeliyê Omer Farûk Gergerlîoglû bi rêya parêzerê xwe Kerem Altiparmak serî li Dadgeha Destûra Bingehîn da.

Di serlêdanê de işaret bi biryarên Dadgeha Mafên Mirovan a Ewropayê, Peymana Mafên Mirovan a Ewropayê û Dadgeha Destûra Bingehîn hate kirin û hate ragihandin ku fezleke ji bo armancên siyasî hatiye amadekirin.

Di daxwaznameyê de hate gotin, "Serlêdêr, ku parlamenterek û parêzvanekî mafên mirovan e, ji ber ku li nava parlamentê û derve qala revandina mirovan, lêgerîna tazîkirî, êşkence û binpêkirina mafên mirovan ên giran ên bi vî rengî kiriye, bûye hedefa desthilatdariyê."