Li Fête de l’Humanite ku li bajarê Lorient ê li Rojavayê Fransayê her sal ji aliyê Partiya Komunîst a Fransayê ve tê lidarxistin, berxwedana Kobanê hat silavkirin. Gelek nivîskarên di çalakiyên li vir de axivîn, daxwaza aştiyê ya gelê Kurd silav kirin û xwedî li berxwedana Kobanê derketin.

Li Fête de l’Humanite ku li bajarê Lorientê her sal bi awayekî kevneşop tê lidarxistin, xwedî li berxwedana Kobanê hat derketin û hat silavkirin.

Çalakiyên ku roja Şemiyê destpê kirin û duh bi dawî bûn, Kurdistaniyên li bajarê Lorientê dijîn jî lê amade bûn. Di axaftinan de berxwedana Kobanê hat silavkirin û banga xwedîderketina li berxwedanê hat kirin.

Di çalakiyê de, li ser êrîşên çeteyên DAIŞ'ê belavok jî hatin belavkirin û endamê Meclîsa Partiya Komunîst a Fransayê û Serokê Bajêr ê Bouche du Rhone Pierre Dharre Ville di axaftina xwe ya li vir de destnîşan kir, ku Kurd li Kobanê li hemberî çeteyên DAIŞ'ê û hevkarên wan bi dildarî berxwedaneke xurt nîşan didin.

Pierre Dharre Ville diyar kir ku yên dibêjim 'Em li cem Kurdan e' di pratîkê de zêde xuya nakin û anî ziman ku hevkariya Fransa û Tirkiyeyê, li dijî daxwazên azadiyê yên Kurdan e.

Nivîskarê Fransî Jean Pierre Bambior jî bal kişand ser gerdûnîbûyîna aştiyê. Bamboir da zanîn ku aştî pêwîstiyeke zarûrî ye û got, "Bi qasî jiyan, têrkirina zikê xwe, tedawî û perwerdeyê pêwîstiya her mirovî bi azadî û aştiyê heye" û bexwedana Kobanê silav kir.

Nivîskar Claude Derullepot jî berxwedana Kobanê silav kir û got, "Bijî Kurdistan". Nivîskar Gerar Gatineau jî got, "Ji bo Kurdistaneke azad ez bang dikim ku helwesta Tirkiyeyê rawestînin."

Gelek nivîskarên di çalakiyê de axivîn, berxwedana Kobanê silav kirin.