Xwendekarê zanîngehê Ferşîd Tecmîrî ku di çalakiyên gelên Îranê û Rojhilatê Kurdistanê de ji aliyê hêzên Îranê ve li Tehranê hate binçavkirin, ev 19 roj in hay jê nîne.

Xwendekarê Fakulteya Fenê ya Zanîngeha Hemedan a Tehranê Ferşîd Tecmîrî, 2 roj piştî destpêkirina çalakiyan ji aliyê kesên ku tê gotin endamên îstîxbarata Îranê (Îtlaat) ne hatin binçavkirin û nayê zanîn bê bi ku ve birine.

Li gorî Rêxistina Mafên Mirovan a Îranê (HRANA), kesekî du roj berê ji Girtîgeha Hemedanê hate berdan xwe gihande malbata Tecmîrî û got, ew bi hev re li heman cihî girtî bû.

Kesê navborî diyar kir ku rewşa Tecmîrî nebaş e û Îtlaatê ew biriye cihekî nediyar. Malbata Tecmîrî li ser mijarê serlêdan kir, lê tê gotin bersiv jê re nehatiye dayin.