Ciwanên Azad bi armanca hêzê bidin hêzên YPG/YPJ û gel ‘ên li dijî çeteyên DAIŞ berxwedaneke bêhempa û destanê dinivîsînin’ banga ‘çalakiya aktîf’ li ciwanên Kurd ên Ewropa kir.

Ciwanên Azad a yek ji rêxistinên ciwanên Kurd a Ewropa ye, di daxuyaniya xwe ya nivîskî de destnîşan kir ku 'hêzên qirêj' ên destkeftiyên gelê Kurd qebûl nakin, çeteyên DAIŞ li hemberî Kobanê didin êrîşkirin û wiha got: “Hovên xistina Kobanê ji xwe re kirine armanc, her cure êrîşên ji rêzikên şer û exlaq bêpar, li ser gelê me pêk tînin.”

Di daxuyaniyê de hat gotin ku li hember vê şervanên YPG/YPJ ya hêza parastina gelê Rojava, “berxwedaneke bêhempa ya di dîroka Kurd de û destanê dinivîse.”

Di daxuyaniyê de wiha hat gotin: “Li hemberî van çeteyên ku bi her cure çekan êrîş dikin şervanên  YPG/YPJ’ên ên bi derfetên bi sînor li ber xwe didin û gelê Kurd careke din bi hêza cewherî ya mirovan dikare çi bike nîşanî dost û dijminan daye.”

Di daxuyaniyê de hat gotin ku êrîşên çeteyên DAIŞ li gelek deveran hatine şikandin lê belê jî hê jî Kobanê ji 'xeleka qirêj' nehatiye derxistin.

Daxuyanî wiha didome:  “Ji ber vê sedemê wek ciwanên Kurd ên li Ewropa hê zêdetir bilindkirina vê berxwedana bi heybet ji bo em nîşan bidin ku eger em li vir bin jî em ê karibin tişta ji destê me tê dikin. Em diyar dikin ku em ketine pêvajoya çalakiyên aktîf.”

Di daxuyaniyê de ji bo çalakiya 24-25’ê Îlonê li paytexta Bruksel a Belçîka banga tevlîbûnê hat kirin. Bi vê ve girêdayî ji ciwanan hat xwestin ku li tevahî bajarên Ewropa xwe bi rêxistin bikin û çalakiyên bi plan li dar bixin.

Ciwanên Azad di dawiya daxuyaniya xwe de wiha gotin: “Dibe ku ji bo sibe gelek tişt dereng be. Îro çi ji destê kê tê divê bike. Pêwîst e çarenûsa xwe em bi xwe diyar bikin. Roj ew roj e ku ciwanên Kurd rabin ser piyan. Roj ev roj e ku ciwanên Kurd ji bo welatên xwe rabin ser piyan. Roj ev roj e ku ji bo Kobanê dest bi çalakiyên aktîf bên kirin.”