Duh li Hevşaredara Sêrtê Sofya Alagaş 6 sal û 3 meh cezayê hefsê hate birîn û îro jî qeyûm hate tayînkirin. Berxwedana li dijî tayînkirina qeyûm li pêşiya Şaredariya Sêrtê hatiye destpêkirin didome. Hevserokê Giştî yê DEM Partiyê Tuncer Bakirhan, Hevserokê Giştî yê Partiya Herêmên Demokratîk (DBP) Keskîn Bayindir û Hevberdevka Kongreya Demokratîk a Gelan (HDK) Meral Daniş Beştaş wek şandeyê hatin bajarê Sêrtê.

Li pêşiya avahiya Şaredariya Sêrtê daxuyanî hat dayin. Di daxuyaniyê de pankarta ku li ser, “Qeyum darbeya li dijî vîna gel e” dinivisî hat hilgirtin

Hevserokê Giştî yê DEM Partiyê Tuncer Bakirhan di daxuyaniyê de anî ziman ku cara sêyemîn e vîna gelê Sêrtê hatiyê desteserkirin û wiha got: “Gelê Sêrtê îradeya xwe radestî wan nake. Gelê Sêrtê li dijî yên ku wan înkar dikin û diziyê dikin bi serket. Lê dîsa jî ji têkçûyinê têr nebûn û îradeya gel desteser kirin. Vîna gelan tune hesibandin. Li tu cihekî dinyayê talaneke bi vî rengî tune ye. Gel her tim bi awayekî xurt we di sindoqan de têk dibe lê hûn dîsa şerm nakin û qeyûm tayîn dikin.” 

Bakirhan, bal kişand ser wêneyê qeyûm kişandî û parve kirî û wiha got: “Dizo ma tu şerm nakî. Bêyî jixwe şerm bikî, weke ku vî gelî dengê xwe dabe te tu dikenî û li ser wê kursiyê rûdinî. Vî gelî her tim desthilata zilmkar di sindoqan de têk bir. Ji bo diziya xwe vêşerin ala Tirk daliqandin. Lê hûn hemû alan bînin jî nikarin diziya xwe vêşerin. Em bang li qeyûm û yên ku ew tayîn kirine dikin ku vî gelî tu car dev jê berneda û polîtikayên we têk birin. Êdî fam bikin gelê Kurd naşikê û wê her tim xwedî li vîna xwe derbikeve.”

‘AŞTÎ WIHA PÊK NAYÊ’

Tuncer Bakirhan destnîşan kir ku bi berdewamkirina van polîtîkayan û tayînkirina qeyûman aştî pêk nayê û wiha axivî: “Em dibêjin diyalog, lê ew dibêjin qeyûm. Bi vî awayî aştî nabe. Bi destdanîna ser şeredariyên Kurdan qetilkirina rojnamegerên Kurd, girtina siyasetmedaran aştî nabe. Bi tayînkirina qeyûman aştî nayê. Ez bang li Bahçelî dikim; tu bi vî awayî çawa aştî pêk bînî. Heke baweriya we bi we hebe sindoqan deynin û rêzê ji vîna gel re bigirin. 

Ez bang li welatiyên Ereb jî dikim û dipirsim yanî ji zilmekî wisa re çi dibêjin. Dest datînin ser vîna we. Divê êdî van qeyûman li vir paqij bikin û bişînin. Em her tim vê şeredariyê bi dest dixin û xizmet didin gel lê bi diziyê desteser dikin. Ew ê bidizin û şeredariyê bixin bin deynan. Ji bo wê ez bang li we dikim ku li dijî vê yekê bitêkoşin. Ew dizê qeyûm ala Tirk datîne û dixwaze talanê bike. Meriv hinek şerm dike. Gelê me divê li tu cihekî rê nede vê talanê. Heta ku pêkanîna qeyûm têk biçe, em nasekinin û em ê têkoşîna xwe bidomînin. Hezar sal ji derbas bibin em ê xwedî li vîna xwe derkevin û bitêkoşin. Ez bang li gelê me dikim ku bi destê van dizan negirin û xwedî li hevşeredarên xwe derbikevin.”

BAYINDIR: EM Ê HETA DAWÎ LI BER XWE BIDIN

Hevserokê Giştî yê Partiya Herêmên Demokratîk (DBP) Keskîn Bayindir di çalakiya protestokirina qeyûm a li pêşiya Şaredariya Sêrtê de axivî. Bayindir, bi bîr xist ku cara 3’yemîn e li Sêrtê qeyûm tê tayînkirin û got: “Ev dagirkere bû cara 3’yan îradeya gelê Kurd desteser dikin. Hûn nikarin bi tu kesî bidin bawerkirin ku li vî welatî hiqûq heye. Hûn, dewletekî mêtinger in. Gelê Kurd vê qebûl nake. Em qebûl nakin. Heta ku em bijîn dê qebûl nekin.” 

Bayindir, got ku li rexekî qala aştiyê li rexa din jî qeyûm li şaredariyan tên tayînkirin û wiha pê de çû: “Ev jî durûtiya dagirkeran e, dijminatiyê ye. Lê em xwedî tecrûbe ne. Birêz Ocalan digot ‘Ev pêvajo girîng e, ji bo Tirkiyeyê firsend e.’ Lê belê ev dagirker vê firsendê tune dikin. Jixwe re biaqil bin. Em li vir hişyar dikin; ji bo berjewendiyên xwe tune nekin. Tekane derdekî we heye; xespkirina îradeya gelê Kurd. Lê gelê Kurd vê qebûl nake. Ya ku tê kirin xespkirina vîna gelê Kurd e. Navê vê li her devera cîhanê, di hiqûqê de dagirkerî ye, dagirkerî ye, dagirkerî ye.” 

Bayindir, banga “jixwe bawer bin” li gelê Kurd kir û axaftina xwe wiha qedand: “Tu hêvî û rêyên wan nemane lê em xwedî hêvî û xwedî rê ne. Rêya me vekirî ye. Em doza gelê xwe dikin. Em dozdarên siyaseta demokratîk in. Berxwedana me roj bi roj mezin dibe. Ji ber ku em mafdar in. Em ji bo serkeftina gelê xwe têdikoşin. Roj ew roj e ku em bi destê hev bigirin, rêxistiniya xwe mezin bikin. Yên ku divê serê xwe li ber xwe biçemînin ne em, dagirkerin, xespkar in. Dê bi saya berxwedan û têkoşîna me biçin. Em ê heta serkeftinê têbikoşin, li ber xwe bidin. Em ê heta dawiyê li ber xwe bidin. Bijî azadî, bijî têkoşîn”.