Parêzer Cahît Ertan diyar kir ku greva birçîbûnê ya li girtîgehan dibe ku mîna dema derbasbûyî pirsgirêkên giran bi xwe re bîne û bang li hikumetê kir ku daxwazên girtiyên siyasî qebûl bike.

Endamê Platforma Hiqûqnasên Azad (OHD) Parêzer Cahît Ertan ji ANF'ê re axivî û got, "Daxwaza bingehîn rakirina tecrîdê ye. Şexs ji derve tê qutkirin, bi tenê tê hiştin. Ev yek, cezayê di nava ceza de ye û binpêkirina hiqûqa navneteweyî û qanûnên Tirkiyeyê ye. Ji bo mafekî bi vî rengî qanûnî û rewa, mirov li girtîgehan dikevin greva birçîbûnê."

DIVÊ HIKUMET BERSIVÊ BIDE

Parêzer Ertaş destnîşan kir ku bi hinceta şewbê tecrîd gihîştiye asteke cuda û wiha dewam kir, "Beriya ku greva birçîbûnê derbasî asteke cuda nebe, divê bersiv bê dayin. Mirov ji bo balê bikişînin ser mijareke têkildarî girtîgehan dest bi greva birçîbûnê ya bêdem û dorveger kirin, lê belê dema ku gaveke cidî neyê avêtin, derbasî greva birçîbûnê ya bêdem û bêdorveger, ya jî rojiya mirinê dibin. Lewma divê hikumet gavê biavêje."

Parêzer Ertan diyar kir ku rê û rêbazên cezakirinê bi hiqûqê hatiye diyarkirin, cezakirina li derveyî vê yekê binpêkirina hiqûqê û mafên mirovan e û got, "Divê ji derve ve xwedî li greva birçîbûnê bê derketin. Gelekî girîng e ku hêzên demokratîk bi berpirsyarî tevbigerin."