Rêxistina Efûyê ya Navnetewî di daxuyaniya niviskî de xwest ku dawî li gendeliyên Tebaxa 2020'an were, bal kişande ser zextên li ser çalakiyên ji bo xizmeteke baştir a cameweriyê were kirin û meaşên derengmayî were dayin.

Di daxuyaniyê de hate gotin, ''Rayedarên Rêveberiya Herêmî ya Kurdistanê bi hinceta 'ewlehiya netewî' kampanyaya girtina girseyî li ser aktivîstên ku protestoyan dişopoîne, çalakgeran û nûçegihanan daye destpêkirin.''

Alîkarê Midûr ê Rêxistina Efûyê yê Rojhilata Navîn û Efrîkaya Bakur Lynn Maalouf diyar kir nûçegihan, aktivîst û çalakger bi rengekî kêfî têne destgîrkirin, nebedîkirin û got, ''Rayedarên Herêma Kurdistanê ya Iraqê sala çûyî ji bo rexnegeran bêdeng bike zexteke ku mirov dibehitîne da destpêkirin .Aktivîst û nûçegihan komî ser hev kirin, bi dozên ne adil, bi sûcdariyên lev tînin rapirsîna wan hate kirin û dema ku xizmên wan bêagahî hatin berdan endamên malbatê tacîz kirin an jî çavtirsandî kirin.''

Maaluf got, ''Rayedarên Herêma Kurdistanê ya Iraqê divê dawî li zextan bîne û çi kesê ku bi kêfî destgîr kirine demildest berde. Her wiha yasayên nediyar û şaş pênasekirî  ji bo sînordarkirina azadiya ramanê û mafê kombûna aştîxwazî, bi kar neyîne.

Li gorî rapora Rêxistina Efûyê li Duhokê nexasim li Behdînanê ji 100'î zêdetir kes hatin girtin, ji van 30 jê hê jî girtî ne û her wiha diyar kir li Behdînanê 3 jê nûçegihan, 11 jê aktivîst, 14 kes ji bo ku tevlî çalakiyên protestoyê bûne, rexne anîne ser rayedarên xwecih û xebatên nûçegihanî ''bi rengekî kêfî hatine girtin.''

Rêxistina Efûyê xwest ku kesên ku bi kêfî hatine destgîrkirin û bêyî darizandineke dadmend hatine sûcdakririn demildset werin berdan, ji bo dawî li tacîz, çavtirsandin û bersiva li ser nûçegihan, parêzerên mafê mirovan, aktivîst û endamên malbatê demildest gav werin avêtin, yasayên kêm pênasekirî û şîlo zû werin guherandin û ev yasa ji bo girtina kesên ku rayedaran rexne dikin weke amûr neyên bikaranîn, di darizandinê de li gorî standara hiqûqa navnetewî û mafê mirovan biçin, divê îfadeyên ku bi êşkence û zorê hatine standin di darizandinan de weke delîl neyên qebûlkirin, derheqê berpirsan lêpirsîneke berfireh û bêalî were destpêkirin.