Ji bo ku balê bikişîne ser êrîşên dagirker ku Tirkiye li dijî Başûrê Kurdistanê dike û ji bo astengkirina şerê di navbera Kurdan de parlementerê eyaleta Berlînê Hakan Taş duh ji ser Stenbolê çûbû Hewlêrê û li Hewlêrê hatibû destgîrkirin. Taş ligel ku parlementer e jî demeke dirêj di nezaretê de mabû û piştî 15 saetan hatibû berdan.

Taş diyar kir ku şîddeta psîkolojîk li wî hatiye kirin û tiştên hatine serê xwe ji ANF’ê re qal kir. Taş diyar kir ku piştî ew ji balefirê daketiya û beriya ku bigihêje cihê kontrola pasaportê yek jê sivîl û yê din jî fermî tu peywirdarên ewlehiyê bi hinceta testa Covîd-19’ê ew birine odeyekê. Taş diyar kir ligel wî gotiye encama testa wî negatîf e jî bi saetan ew dane sekinandin û piştre testeke formalîte kirine.

‘JI MIN RE GOTIN ‘TEVLÎ HINEK TIŞTAN NEBE’

Taş diyar kir wî xwestiya telefonî Sefaretxaneya Elmanyayê bike lê peywirdaran ew asteng kirine û got  “Xwestin dest deynin ser telefona min, dema ku ez li dij derketim dîsa dan min. Rayedarekî Hewlêrê diyar kiriye ez nehatime girtin lê bi saetan azadiya min asteng kirin û dest danîn ser pasaporta min.”

Taş diyar kir ku kesên ew dane ber lêpirsînê ji wî xwestine bila tevlî hinek tiştan nebe û got “Ligel ku min pirsî ev tê çi wateyê lê bersiv nedan min. Lêborîna xwe xwestin û ez serbest berdam.”

Taş diyar kir piştî ew ji balefirgehê derketiye, ew hatiye şopandin û neçar maye ji Hewlêrê derkeve. Taş got “Ez nizanim kê ez şopandim. Ji ber vê jî min xwe gihand cihekî ewle yê ku înternet û telefon lê baş dikişîne.”

Taş diyar kir ew ê li herêmê bimîne û ji bo aştiyê têbikoşe û got “Em Partiya Çep ji bo ku şer nebe, em bi salan têdikoşin. Ji bo ku li qadên şer çek neyên firotin em têdikoşin. Mafekî normal e ku em bi mirovên aştîxwaz û bi wan kesan re bin yên ku ji bo aştiyê alternatîfan hildiberînin. Mafê tu kesî tuneye ku vî mafî desteser bikin.”