Ji 9'ê Cotmeha 2020'î dema ragihandina lihevkirina Hewlêr-Bexdayê a li ser Şengalê û vir ve, ku bêyî xelkê Şengalê hate amadekirin, nerazîbûna şêniyên herêmê dewam dike. Xelkê Şengalê ku vê peymanê weke hewldanek ji bo tunekirina nirx û saziyên Şengalê dibînin, beriya 59 rojan li ber Navenda Asayîşa Êzidxanê kon vedan û xwedî li asayîşa xwe derdikeve.

Çalakî bi dirûşma "Em hemû asayîş in" dest pê kir û rojane bi tevlîbûna şêniyên ji gund û bajarokên Şengalê dewam dike. Herî dawî xelkê Dahola û Borikê nobed girtin.

Ji çalakgeran Tewrê Xelef ji Jinnewsê re axivî û got, "Divê asayîşa me ji aliyê hikumetê ve bê naskirin... 7 sal in zarokên me me diparêzin. Em jî li ber xwe didin û xwedî li asayîşa xwe derdikevin."

Gulistan Xidir jî got, "Civaka Êzidî ne weke ya beriya fermanê ye, xwe nas dike û bi rêxistin kiriye. Divê xelkê Êzidî bi yek carî di nava berxwedanê de be."