Li Rojhilat û Îranê berxwedan mezin dibe
Berxwedana ku piştî qetilkirina jina Kurd Jîna Emînî dest pê kir, li bajarên Îran û Rojhilatê Kurdistanê belav dibe.
Berxwedana ku piştî qetilkirina jina Kurd Jîna Emînî dest pê kir, li bajarên Îran û Rojhilatê Kurdistanê belav dibe.
Çalakiyên ji bo jina Kurd Jîna Emînî ya hatî qetilkirin li seranserê Îran û Rojhilatê Kurdistanê berdewam dikin. Li hin bajaran jî xwepêşandan hatin destpêkirin.
Hate diyarkirin ku gelê bajarê Şinoyê, hêzên Îranê ji hin kolanan derxistine.
Di navbera hêzên Îranê û gelê bajarê Sine de şer û pevçûnên mezin derketin. Li bajarê Bokanê jî hêzên Îranê rasterast malan gulebaran dikin.
Li Tehran, Meşhed û Kumê ku hê jî xwepêşandan lê berdewam dikin, hêzên Îranê rasterast gel gulebaran kirin.
Li bajarê Meşhedê peyker û posterên gelek rayedarên dewletê hatin şewitandin.
Her wiha Kurdên li Xurem Awa (Loristan), Erdebîl û Xorasanê jî dest bi xwepêşandanan kirin.
GEL LI HEMBERÎ ÊRÎŞAN VENAKIŞE
Li gorî rapora Rêxistina Mafên Mirovan a Îranê, di xwepêşandanan de heta niha 50 xwepêşander hatine qetilkirin. Tevî destgîrkirinên girseyî jî, gel ji kolanan venakişe.