Komxebata "Dem dema parastina ziman e" bi hevkariya Partiya Demokratîk a Gelan (HDP); Komeleya Lêkolîna Çand û Ziman a Mezopotamyayê (MED-DER) ve tê lidarxistin. Komxebat li Amedê li otelekê desdt pê kir û wê du rojan dewam bike. Di komxebatê de wê zext, qedexe û polîtîkayên asîmîlasyonê yên li ser Kurdî û gavên li dijî van astengiyan bêne nirxandin.

Di nava beşdaran de rêveberên Platforma Zimanê Kurdî, pêkhateyên Tevna Çand û Zimanê Kurdî, Parlamentera HDP'ê ya Amedê Dersim Dag, rêveberên Partiya Komunîst a Kurdistanê (KKP) û aktîvîstên Tevgera Jinê ya Azad (TJA) hene. Di destpêka komxebatê de Hevseroka MED-DER'ê Şîlan Elmas Kan axivî.

Şîlan Elmas Kan bal kişand ser qedexeya ku qeyûmê talanker daniye ser Kurdî û li dijî qeyûm û polîtîkayên tunekirina ziman, ji bo zimanê Kurdî tevlî siyasetê û civakê bibe, ew têdikoşin.

SILAVA JI GIRTIYÊN SIYASÎ

Hevserokê MED-DER'ê Rifat Ronî ku ji Girtîgeha Girtî ya Tîpa D a Amedê nû hate berdan, di destpêka axaftina xwe de silavên girtiyên siyasî ragihand. Rifat Ronî got, "Gelê Kurd bi salan e j ibo zimanê xwe yê dayikê berdêlên gelekî giran da û têkoşiya. Zimanê dayikê ji bo naskirina miletekî xwedî roleke girîng e. Em ê xwedî li zimanê xwe derkevin û ji nifşên xwe yên nû re ragihînin."

BANGA JI BO AXAFTINA BI KURDÎ

Parlamentera HDP'ê Dersim Dag jî qala karê partiya xwe kir ên ji bo Kurdî bibe zimanê fermî û perwerdeyê. Dersim Dag got, "Em, siyasetmedarên kurd, em ê polîtîkaya xwe ya ji bo ziman xurt bikin. Roj roja axaftin û xwedîderketina li Kurdî ye. Em ê xwedî li zimanê xwe derkevin, hîn bêhtir pê bixwînin, biaxivin û binivîsînin."

Piştî axaftinan têkildarî êrişên li ser zimanê Kurdî û girîngiya zimanê Kurdî sînevîzyon hate nîşandan.

Komxebat piştî nîşandana sînevîzyonê bi rengekî li çapemeniyê girtî dewam kir.