Li gorî agahiyan, kesên ku ber bi avahiyên HDP'ê yên Amed, Wan û Colemêrgê ve têne şandin, bi haziyên dewletê re li ser kadrotî û pereyan peyman çêkirine û êrîşa herî dawî ya 19'ê Tebaxê ya li ser avahiya HDP'ê ya Colemêrgê jî ji ber vê yekê bû.

Hevserokê Colemêrgê yê Partiya Demokratîk a Gelan (HDP) Lokman Ozdemîr anî ziman ku nêzî du sal in hin kes ber bi avahiya HDP'ê ve têne dehfdan. Ozdemîr got, "Heqaret, neheqî û dijminatiyê li partiya me û gelê me dikin."

Ozdemîr diyar kir ku zarokên piraniya kesên têne pêşiya avahiya HDP'ê neçûne çiyê û got, "Delîlên vê yekê li ber destê me hene, navên wan jî hene. Yên bixwazin em dikarin navê wan jî bibêjin. Tevî ku zarokên van mirovan neçûne çiyê, têne pêşiya HDP'ê û heqaretê li me dikin. Hinek ji wan ji bo kadrotiyê ji dewletê werbigire tevlî dibin, hinek jî provokatorên bi peyman e. Heqaretê li me dikin û bi vî rengî plan dikin ku sebra me bifûrînin û bikin ku em êrîşî wan bikin. Em ê nekevin xefika wan."

'COLEMÊRGÎ DI NAVA WAN DE KÊM E'

Ozdemîr anî ziman ku piraniya kesên ber bi avahiya HDP'ê ya Colemêrgê ve têne şandin ne ji Colemêrgê ne û got, "Em naxwazin ku êdî bên. Em dixwazin ev şer êdî biqede û kes neyê kuştin. Yên ku îdîa dikin ku zarokên wan çûne çiyê bila neyên vê derê, ji bo xwîn neyê rijandin bila têbikoşin."