Fermandariya HPG'ê ya Mexmûr-Kerkûkê, pênc endamên Yekîtiyên Xweparastinê yên di êrîşê de şehîd bûn bi bîr anî û sersaxî ji malbatên wan û gelê Kurd re xwest.

Di daxuyaniyê de hat gotin, "Heta dilopa dawî ya xwîna xwe em ê gelê xwe biparêzin" û bang li Neteweyên Yekbûyî, rêveberiyên Bexda û Hewlêrê hate kirin.

EM ŞEHÎDÊN XWE BI BÎR TÎNIN

Di daxuyaniyê de hat gotin, "6'ê Kanûna 2017'an saet di 18:45'an li dijî kampa Şehîd Rustem Cûdî ya Mexmûrê êrîşek bi balafiran hate kirin. Ev êrîşa namerdî li dijî nuqteyeke Yekîneyên Xweparastinê yên Mexmûrê hatiye kirin. Di vê êrîşa ku bi tirsonekî hate kirin de şervanên leheng hevalên me Botan (Cebraîl Asûtay), Baz (Gokhan Kirboga), Çekdar (Mûhammed Tekeş), Bager (Abdulkadîr Gunay) û Devran Mardîn şehîd bûn. Di şexsê hevrê Botan de ku nîşaneya ked, wêrekî û fedakariyê bû, em sersaxiyê ji malbatên hemû şehîdên xwe yên leheng, gelê xwe yê li kampa Şehîd Rustem Cûdî û tevahiya gelê Kurdistanê dixwazin."

NEKARÎN XWE LI TÊKÇÛNA DAÎŞ'Ê RABIGIRIN

Fermandariya HPG'ê destnîşan kir ku ev êrîş ji aliyê hêzên ku nikarin xwe li têkçûna DAÎŞ'ê rabigirin ve hatiye kirin.

Di dewama daxuyaniyê de hat gotin, "Piştî ku çeteyên DAÎŞ'ê yên dijminê mirovahiyê sala 2014'an Mûsil dagir kirin, Yekîneyên Xweparastinê yên Mexmûrê ji bo pêşî li van êrîşên dagirkeriyê bigirin, komkujiyên cinawirên DAÎŞ'ê rawestandin. Çeteyên DAÎŞ'ê li pêşberî berxwedana Mexmûr-Şengal-Kobanê şikestin. Li dijî vê şebekeya dijminê mirovahiyê ya faşîst-dagirker, ku hikumeta Başûrê Kurdistanê, hikumeta navendî ya Iraqê û dewletên herêmê û cîhanê nikarîbûn bisekinin, gelan bi ked û têkoşîna van berxwedêrên leheng li ber xwe dan. Vê berxwedanê îro DAÎŞ aniye ber tinebûnê. Êrîşa bi balafiran a roja 6'ê Kanûnê li dijî van ewladên leheng ên gelê me hate kirin, ji aliyê wan hêzên ku têkçûna DAÎŞ'ê dikin nakin nikarin qebûl bikin weke bersivdanê hatiye kirin.

ÊRÎŞKAR MÊTINGERIYA TIRK E

Bêguman em vê êrîşa namerdî weke êrîşeke mêtingeriya Tirk dibînin ku destekê dide çeteyên DAÎŞ'ê. Ev êrîş li dijî kevneşopiya serînetewandin û berxwedêr a gelê me yê Mexmûrê, êrîşeke tinekirinê ya mêtingeriya Tirk e. Dewleta Tirk a faşîst bi rêya vê êrîşa xaniyî hewl dide gelê Mexmûrê dîl bigire û tolê hilîne."

BANG LI NETEWEYÊN YEKBÛYÎ, HEWLÊR Û BEXDAYÊ HATE KIRIN

Di daxuyaniya HPG'ê de bang li Neteweyên Yekbûyî, rêveberiyên Hewlêr û Bexdayê hate kirin:

"Bi qasî yên ku ev êrîşa faşîst pêk anîn, yên ku destûr dan û piştevaniya wê kirin jî kiryar û sûcdarên êrîşê ne. Kampa Şehîd Rustem Cûdî ya li Mexmûrê di bin parastina Neteweyên Yekbûyî de ye û li nava axa Iraqê ye. Lewma em li benda xuyaniyeke qanihkirinê ne. Eger di vir de hevkariyek tine be, wê demê divê ev hêzên navborî lêkolîn bikin bê ev êrîşkariya faşîst û karên terorîstî çawa hatiye kirin. Ji ber vê yekê em li bendê ne ku di serî de hikumeta Kurdistanê ya federe, hikumeta Iraqê û Neteweyên Yekbûyî daxuyaniyekê bidin gelê me yê Mexmûrê û tevahiya gelê Kurd. Em, bêdengiya li pêşberî vê êrîşê jî weke hevkariya bi mêtingeriya Tirk re dibînin.

EM Ê GELÊ XWE BIPARÊZIN

Weke Fermandariya Mexmûr-Kerkûkê em careke din dubare dikin: Mêtingeriya Tirk a faşîst û hevkarên wê, bi vê êrîşa faşîst re wê bi ser nekevin. Gelê me yê Mexmûrê yê bi rûmet û welatparêz, çawa ku salên 1990'î li dijî mêtingeriya Tirk a faşîst li ber xwe da, wê îro jî bi rengekî bê eman li ber xwe bide. Weke Fermandariya HPG'ê ya Mexmûr-Kerkûkê em soza xwe dubare dikin ku heta dilopa dawî ya xwîna xwe em ê gelê xwe biparêzin û têoşîna hevrêyên xwe yên şehîd bûne bi ser bixînin."