Hevserok û rêveberên Kongreya Civaka Demokratîk (KCD), Tevgera Jinê ya Azad (TJA), Partiya Herêman a Demokratîk (DBP) û Partiya Demokratîk a Gelan (HDP) ku ji bo yekîtiya neteweyî ya Kurdan li Êlihê ye, li navçeya Kercewsê serdana dikandaran kir.

Hevserokê KCD'ê Berdan Ozturk, aktîvîstên TJA'yê, Hevseroka DBP'ê Salîha Aydenîz, parlamenterên HDP'ê Ruştu Tîryakî, Dersim Dag û Sidik Taş, endamên Meclîsên Ciwanan ên HDP'ê di dema serdanê de amade bûn.

HEYET BI DIRÛŞMAN HATE PÊŞWAZÎKIRIN

Heyet li navenda navçeyê ji aliyê dikandaran ve bi dirûşmên "Bijî berxwedana zindanan", "Jin, jiyan, azadî" û "Bimire xiyanet, bijî Kurdan" hate pêşwazîkirin. Heyeta ku bi baldarî hate pêşwazîkirin li gel astengiyên polîsan jî li nava esnafan geriya.

LI HESKÎFÊ SERDANA JI BO ESNAFAN

Heyetê piştî serdanê berê xwe da Heskîfê. Li avahiya navçeyê hate pêşwazîkirin û piştre serdana esnafan kir. Esnafan diyar kirin ku di dema Heskîfa berê de karê wan baş bû, lê niha dikan vala ne, karê wan nîne.

'HEMAN BARBARIYA DAÎŞ'Ê'

Hevseroka Giştî ya DBP'ê Salîha Aydenîz diyar kirin ku Heskîfa 12 hezar salî ji bo bendava 50 salî hatiye qurbankirin. Aydenîz êrişa DAÎŞ'ê ya li ser Rojava bi bîr xist û got, "Çawa ku DAÎŞ'ê bi rengekî bêrehm êrişî dîrokê kir ku têk bibe, niha jî heman rewş heye. Li vir hilweşîneke bi barbarî hate kirin. Yên ku li ber vê hilweşînê rabûn DAÎŞ gihand ber tinekirinê. Îro jî salvegera azadkirina Kobanê ye. Îro ew roj e ku hovîtî hate bidawîkirin û gelek azad bû. Ev berxwedan berxwedana sedan salî ye."