Alîkara Hevserokên Giştî yên HDP'ê ya ji Komîsyona Gel û Baweriyan Berpirsyar a HDP'ê û Tulay Hatîmogûllari û Meclîsa Baweriyan û Gelan a Kongreya Demokratîk a Gelan (HDK) ji ber salvegera 106'an a Qirkirina Suryanan (Seyfo) daxuyanî dan.

Di daxuyaniya HDK'ê de hate gotin, "Beriya niha bi 106 salan, bi hin bahaneyan komkujî û qirkirin li gelên qedîm ên vê cografyayê hate kirin. Di çarçoveya biryarên Cemiyeta Îttîhat û Terakkî de rewşenbîrên Ermen hatin qetilkirin, piştre jî li dijî gelên ne misilman polîtîkaya tunekirinê ya bi rêk û pêk hate meşandin. Suryaniyên ku bi hezaran sal in li Anatolî û Mezopotamyayê ne hatin qirkirin (Seyfo)."

Di daxuyaniyê de hate ragihandin ku wê Seyfo ti carî ji bîr nekin, nedin jibîrkirin û hate gotin, "Em Suryaniyên ku sala 1915'an li Seyfo hatin qetilkirin, bi rêzdarî bi bîr tînin. Ji bo careke din li cîhanê qirkirin nebe, divê gel bibin yek û têbikoşin. Dewletên ku sûcê qirkirinê kirine ji aliyê aborî, civakî û çandî ve divê teqez berdêlê bidin. Têkoşîna bi hev re ya gelan wê jiyaneke bêçîn û bêsînor ava bike."

HDP: DIVÊ LÊBORÎN BÊ XWESTIN

Di daxuyaniya HDP'ê de jî hate bibîrxistin ku beriya sala 1915'an li Tirkiyeyê zêdeyî 500 hezar Suryanî, Asûrî, Aramî û Keldanî hebûn, lê niha hejmara Suryaniyan bi qasî 25 hezar kesî ye.

Di daxuyaniyê de hate gotin, "Bendewariya xelkê Suryanî ew e ku lêborîn bê xwestin, hesabê qirkirinê bê dayin, bersiv ji bendewariyan re bê dayin û li ser bingeha welatiyên wekhev bijîn. Dixwazin di vê çarçoveyê de gav bên avêtin."

Di daxuyaniyê de di salvegera 106'an a Qirkirina Suryanî de kesên jiyana xwe ji dest dane bi rêzdarî hatin bîranîn.