Sînemager Mensûr Kerîmiyan di 23’yê Kanuna 2023’yê de li Rojavayê Kurdistanê di encama êrişa dewleta Tirk a dagirker de şehîd bû.

Cenazeyê şehîd Mensûr Kerîmiyan di 30 Kanuna 2023’yan de ji Rojavayê Kurdistanê bi merasîmek girseyî ji bo Başûrê Kurdistanê hate oxirkirin.

Piştî cenaze gihişt Silêmaniyê, di 31’ê Kanun (2023) merasîma oxirkirina cenazeyê şehîd Mensûr Kerîmiyan li ber derê Sînemaya Salim ya li bajarê Silêmaniyê, bi tevlîbûna dehan hunermend, nûnerên aliyên siyasî û xelkê Başûrê Kurdistanê bi deqeyek rêzgirtinê pêkhat. Piştî merasîmê cenazeyê şehîd Mensûr ber bi Rojhilatê Kurdistanê ve hate oxirkirin.

Dihat payîn, cenazeyê Şehîd Mensûr li warê wî bajarê Sine ya Rojhilatê Kurdistanê bihatiba veşartin. Lê dewleta Îranê nehişt cenaze derbasî Rojhilatê Kurdistanê bê kirin.

Ji bo vê jî malbatê biryar da di 7’ê Çileyê saet 10:30 cenazeyê Kerîmiyan li goristana Şêx Ebas ya li taxa Wilube ya Silêmaniyê bispêrin axê.

Şehîd Mensûr Kerîmiyan di sala 1984’an de li bajarê Sine ji dayîk bû. Nêzî 20 sal di warê sînemayê de kar kir. Du salên dawî li Rojavayê Kurdistanê derhêneriya fîlman dikir.