Platforma Jinan a Dîcle ya Amedê (DAKAP) bi boneya Roja Dayikan serdana “Nobeta Edaletê“ kir û li ber Bîrdariya Mafên Mirovan ya Parka Koşuyolu ya Rêzana Amedê daxuyanî dan. Tevgera Jinên Azad (TJA), Komeleya Jinan a Rosa û Konfedarasyona Sendîkayên Karkerên Şoreşger (DÎSK) a Amedê tev li daxuyaniyê bûn.

‘DAYIKÊN BERXWEDÊR TIMÎ LI QADAN LI BER XWE DIDIN‘

Rêvebera Komeleya Jinan a Rosayê Raîfe Camci di destpêke de axivî û qala Emîne Şenyaşar û dayikên ku "Nobeda Edaletê" digrin kir û got: "Hewceye ku demildest edalet pêk bê. Mixabin desthilatdarî di nava civakê de tirsek avakiriye. Lê dayikên berxwedêr her tim li qadan bûn." Camci bal kişand li ser rewşa siyasetmedar Aysel Tûglûk û wiha berdewam kir: "Hewceyê ku Aysel Tûglûk bê berdan. Gelek dayik li qadan ji bo edaletê bang dikin"

Ji rêveberiya Komeleya Jinan a Rosayê Fatma Sunbul daxuyanî xwend. Sunbul destnîşan kir ku ji neolîtîkê heta niha jin her tim alîgirê aştiye bûn û her tim mafê jiyanê parastine û wiha axivî: "Lê niha dayikbûn wek tiştekî biyolojîk tê pênasekirin. Hemû desthilatdarî dayikbûnê anîne li hemberî jinan. Jinbûn di nava malbat de hatiye sînorkirin. Îro em qala jinên ku ji bo azadiyê li ber xwe didin û ji bo aştî û edaletê têdikoşin em qala wan dikin."

Sunbul anî ziman ku gelek dayik li ber xwe didin û wiha domand: "Dayika Cemîle Çagirga ya ku li Cizîrê hat qetilkirin, Emîne zaroka xwe xist sarincê. Dayik ji bo edalet pêk bê 427 roj in li ber xwe didin. Dayika Emîne Şenyaşar wek kesek li hemberê bêmafiyan li ber xwe dide. Dayika Gulistan Dokû Bedriye Dokû ji bo keça wê bê dîtin her roj banga pêkanîna edaletê dike. Dayikên Şemiyê ji bo hestiyê zarokên xwe bibînin her heftê çalakî li dar dixin. Dayikên Aştiyê her roj ji bo şer bi dawî bibe û jiyaneke bi rûmet li ber xwe didin. Desthilatdarî van dayikan wek 'Dayikên terorîst' pênase dike. Lê pêwistiya dayikan bi pîrozbahiyan wan tune ye. Em van dayikan pîroz dikin û dibêjin roja wê pîroz bê."

'EM LI SER ŞOPA ZAROKÊN XWE NE‘

Piştî daxuyaniyê Dayika Reşahad Ada axivî û wiha got: "Em edaletê dixwazin. Zarokên me di girtîgehan de îşkenceyê dibînin. Em şopdarên rêya zarokên xwe bin. Bila ji girtîgehê êdî cenaze dernekevin. Em vê zilmê qabûl nakin. Zarokên me ji bo axa xwe li ber xwe dan. Ez roja hemû dayikan pîroz dikim."

Daxuyanî bi dirûşma "Jin, jiyan, azadî" û "Bijî berxwedana dayikan" bi dawî bû.

Her wiha ciwanên ku dema dirûşma "An serkeftin an serkeftin" berz kirin polîsan hewlda ku mudaxaleyê ciwanan bike. Dayikên ku tev li daxuyaniyê bûn mudaxaleyê polîsan kir. Piştî rageşiyê girse bi çepik û tilîliyan belavbû.