Yek ji çar kesên roja Înê li taxa Reşa Sebrî ya navçeya Qereyazi ya Erzîromê ji aliyê hêzên dewletê ve hatin kuştin, Taner Agar e. Hêzên dewleta Tirk êşkenceyê li mirovên tên sersaxiya malbata Taner Agar dikin.
Li gorî agahiyên ji çavkaniyên herêmî hatin girtin, piştî kku cenazeyê Taner Agar hate veşartin, polîs û leşkerên Tirk avêtin ser qada sersaxiyê û êşkence li mirovên hatin sersaxiya malbata Agar kirin.
Taner Agar rojek piştî hate kuştin li gundê Kurdka yê navçeya Qereyaziyê nîvê şevê hatibû veşartin. Rojek piştî veşartina cenaze, jenderme û çeteyên tevgera taybet ên dewleta Tirk dor li gund girtin, nehiştin konê sersaxiyê bê vedan û li mirovên hatin sersaxiyê xistin.
Kekê Taner Agar Sevdîn Agar û xizmên wan jî bû hedefa êşkence û şîdeta jenderme û çeteyên dewleta Tirk.
Tê gotin, çeteyên AKP'ê nasnameya mirovên hatin sersaxiyê kontrol kirin û piştre heqaret û şîdet li wan kirin.
Çeteyên AKP'ê duh jî avêtin ser gundê Kurdka û gef li mirovan xwarin. Li gorî agahiyan, xetên ragihandinê yên li gund ji aliyê çeteyan ve hatine birîn.
