Jinên Kurd ku ji bo şermezarkirina êrişên dewleta Tirk ên li ser Kurdan her roja Şemiyê dadikevin qadan, doh jî li bajarên Stockholm, Orebro, Goteborg û Ûppsalayê yên Swêdê daketin qadan.

Di çalakiyan de alên Tevgera Jinên Kurd, PKK, KCK'ê hatin hildan û bi pankartan desteserkirina şaredairyan û girtina siyasetmedarên Kurd hatin şermezarkirin.

Çalakiya li paytext Swêdê li kolana Drottnîngsgatanê pêk hat û têkildarî helwesta medya AKP'ê ya ku parlamenterên Sosyal Demokrat ên Swêdê dike hedef, belavokên şermezarkirinê hatin belavkirin.

Li bajarê Goteborgê jî bi banga Komuna Jinê ya Sema çalakî hate kirin û daxwaza bidawîbkirina tundiya li jinê hate kirin. Her wiha bang li gelê Swêdê hate kirin ku li dijî êrişên dewleta Tirk ê li ser Kurdan nerazîbûnê nîşan bidin û piştgiriyê bidin gelê Kurd.

Di çalakiyan de her wiha desteserkirina şaredariyên HDP'î û operasyonên qirkirina siyasî yê li dijî siyasetmedarên HDP'î hatin şermezarkirin.

HELSÎNKÎ

Bi banga Tevgera Jinê, Kurdistanî li navenda Helsînkiyê li hev kom bûn û tundiya li nava civakê, êriş û zextên dewleta Tirk ên li dijî Kurdan şermezar kirin.

Di çalakiyê de li dijî desteserkirina şaredariyên HDP'î pankart hatin hildan û têkildarî mijarê mirovên li derdorê hatin agahdarkirin.

Çalakî bi qîrîna dirûşmên li dijî dewleta Tirk bi dawî bû.